Sosializa ID Úniku Ba UNITAL, TIC Timor : Reforma Administrasaun Dalan Ba Guvernu Eletrónika

Imagen TIC Timor I.P hamutuk Docente UNITAL, Iha Salaun UNITAL Becora, 20/10/2022

SAPNewsTL, DILI – TIC Timor I.P liu husi Diresaun ID Úniku hahu implementa Programa Identidade Uniku ne‘ebé sei hala’o rejistrasaun ba sidadaun Timor-Leste, Iha prosesu implementasaun ne’e Diresaun ID Úniku sei hala’o sosializasaun ba Programa Identidade Uniku ne’e iha territériu laran tomak.

Objetivu husi programa ne’e atu reforma administrasaun publiku liu husi alista implemetasaun sistema identifikador uniku ne’ebe modernu, hodi mellora prestesaun servisu públika, hadiak jestaun no kordenasaun politika sosial sira atu identifika no auténtika identidade sidadaun no populasaun iha teritoriu laran no metodu aproriadu no efisente,

Projeitu Identidade Úniku estebelese bazeia ba rezolusaun governu Nú. 9/2020 loron 19 marsu 2020, ho kondisaun tékniku eventual kompostu husi MPCM, MJ, MF, MSSI , MEJD, MS, MAE, CFP No TIC TIMOR I.P.

“Programa ID Úniku ne’e mos parte ida husi programa VII Governu konstisional ne’ebé mai husi planu estratejiku dezenvolvimentu nasional,  nune’e oinsa ita iha Timor Leste bele implementa governu eletrónika ne’ebé úniku hanesan fundasaun importante ida”. Hateten Director Interino TIC Timor Justo Fernandes ba jornalista sira iha Salaun Enkontru UNITAL Becora, Kinta-feira (20/10)

Diretor TIC Timor I.P Justo Fernandes

Diretor ne’e salienta, Úniku ID ko’alia kona-ba Siguransa no kona-ba lei sira, no oinsa atu proteje  kona-ba dadus sidadaun sira hotu, inklui iha vantagens ba populasaun sira iha parte administrasaun inklui sira seluk

“ID Uniku iha Benefisiu prinsipál ba públiku, wainhira ita ba buka servisu ou ita ba iha banku atu loke ita nia konta bankaria iha ne’ebá, ita sei presiza karta husi Xefe Aldeia, Xefe Suku nomós ba polisia sira ma ita  foin bele halo dokumentus sira ne’e hotu, entaun liu husi identidade Úniku ida ne’e ema verifika de’it ita nia ID Úniku, por ezemplu ita involve iha krime ka lae, ida ne’e sistema ho sistema sei koalia ba malu depois iha ne’ebá verifika katak, ema ne’e la involve krime ruma, iha ne’ebá fó dalan ne’ebé seguru”. Nia Sublinha

Nia hatutan sosializasaun sira halo dala barak ona, iha RAEOA, UNDIL, UNITAL no mós tuir tarjetu sei ba ministériu sira hotu  inklui munisipiu sira hotu

Nia realsa, Programa ID Uniku durante tinan lima governu aloka osamentu hamutuk $13.8 Millões “Orsamentu ne’ebé aloka ba iha programa ID Úniku, iha primeiru faze hamutuk $.3 millões ba implementasaun, sosializasaun nomós atu prokura sasan baziku sira no eletróniku sira, portantu osamentu total implementasaun ID Úniku ba tinan 5 ninian hamutuk $.13.8 millões”. Informa nia

Vise-Reitor II UNITAL Arlindo do Ceu Fatima

Iha sorin seluk, Vise-Reitor II UNITAL Arlindo do Ceu Fatima konsidera politika ID Uniku politika ida di’ak, akademiku suporta tanba politika ida ne’ebé di’ak hodi ajuda sosiedade tomak liu-liu iha parte administrasaun públika

“ID Úniku nu’udar programa ida ne’ebé  ajuda, oinsa mak ita bele ajuda governu para bele sosializa, sistema ne’e se karik organiza ka hala’o iha ita nia rai ida ne’e bele ita komesa redus ba interese- interese ne’ebé dala barak akontese iha sosiadade tomak liu-liu kona-bá ID falsu sira ne’e, kartaun sira ne’ebé durante ne’e falsu mak barak, maibé liu hosi ida ne’e ita bele minimiza ona”. Nia hatete

Jornalista : Antonio Tilman

Editor        : Ekipa Editorial