Tasi-Tolu Sai Sasin, PD Promete Hatun Taxa Folin Sasan No Passaporte

SAPNewsTL, Dili : Iha Komísiu Públiku Partidu Demokrátiku (PD) ne’ebe hala’o iha fain históriku Tasi-Tolu, Presidente Coselho Política Nacionál (CPN) Adriano do Nacimento promete, wainhira PD ba ukun, guvernu sei implementa programa kréditu ba estudante sira, hadia infraestrutura, ekonomia, hamenuz taxa folin sasan no hamenuz folin passaporte husi $100 ba $50 no $50 ba $30

“Wainhira PD ba ukun, programa kréditu ba estudante sira ne’ebe remata sekundária harak kontinua estudu iha Lisensiatura, Mestradu no Doutoramentu nune’e bele pruduz Timor oan ne’ebe matenek no kualidade, hadia infraestrutura, ekonomia, sosial, hamenuz taxa folin sasan, ita labele halo explorasaun ba povu, no hamenuz folin passaporte husi $100 ba $50 no $50 ba $30”. Promete Presidente CPN PD Adriano do Nacimento iha Tasi-Tolu, 14/05/2023

Iha fatin hanesan, Presidente PD Mariano Assanami Sabino alerta ba partidu hotu-hotu, Jovens sira, Artes oioin, no povu Timor Leste hamutuk sai forsa ba paz no estabilidade, tanba ita mai husi hun ida, abut ida, povu ida, iha rai Timor ida deit

“Ha’u lolo liman ba Partidu hotu-hotu, artes oioin, joven sira, inan aman sira, veteranus sira, ita hotu tenki hamutuk iha halo mudansa, hadia ita nia rai, ita hotu hamutuk tenki sai forsa ba paz no estabilidade ne’ebe fo seguransa ba ita nia rain ne’ebe sosa ho 300.000 pessoas nia mate, la’os tempu para ita tuda malu, oho malu, maibe tempu para moris diak, kontente nu’udar maun ho alin hodi Timor ba oin nu’udar hun ida, abut ida, povu ida rai Timor ida deit”. Tenik Presidente PD Mariano Assanami Sabino iha Tasi-Tolu, 14/05/2023

Presidente PD hatutan, Partidu Demokrátiku hakarak salva guvernu ida ba povu tomak ne’ebe la’os guvernu ba kor no partidu, guvernu tenki ba ema hotu ne’ebe servi povu maubere ho dignu

“Ita tenki kria kampu servisu ba joven sira, hadia instituisaun estadu sira, hadia Parlamentu Nasional ne’ebe labele insulta malu, hadia PNTL ne’ebe servi ba ema hotu ho profisional, PD hakarak salva estadu, guvernu ne’ebe labele ba kor no partidu, nune’e bele garante moris diak no tratamentu dignu ba povu maubere”. Dehan Assanami

Entretantu, Lider PD Adriano do nacimento mos preokupa ba fundu minarai ne’ebe menuz daudaun, kampu bayuu undan ne’ebe iha ona faze desmantelamentu, PD sei esforsu hodi halo investimentu iha kampu greater sunrise no dada pipe line mai Timor Leste

“Kampu Bayu Undan besik atu maran ona ne’ebe iha ona desmantelamentu, ita sei esforsu hodi dada pipe line mai Timor Leste”. Nia dehan

Iha Komísiu ne’e hetan Partisipasaun maksimu husi militante no simpazante sira iha Kapitál Dili ne’ebe kompostu husi Postu Administrativu Dom Aleixo, Vera Kruz, Nain Feto, Metinaru no Kristu Rei

Komisiu ne’e la’o ho diak tanba hetan seguransa husi Polisia nasionál Timor Leste (PNTL), Batelaun Odem Públiku (BOP), observador nasional no internasional sira

Ermelinda Soares