Televizaun ABC Sei Apoia Mídia RTTL, E.P

SAPNewsTL(Dili) : Prezidente Repúblika, José Ramos-Horta, kinta-feira semana kotuk, simu audiénsia husi Ekipa televizaun Australian Broadcasting Cooperation-ABC hodi ko’alia kona-ba akórdu kooperasaun ne’ebé estabelese ona ho mídia sira iha Timor-Leste.

Prezidente Konsellu Administrasaun Rádiu no Televizaun Timor-Leste, Empreza Públika-RTTL,ep, José António Belo ‘Taraleu’ ne’ebé partisipa mós iha enkontru ne’e hateten, televizaun ABC hakarak materializa  kooperasaun ho RTTL no mídia sira iha Timor.

“Ohin kolega sira mai informa ba Prezidente-da-Repúblika saida mak sira sei halo atu apoiu mídia sira iha Timor-Leste liu-liu ba RTTL relasiona ho memorandu entendimentu ne’ebé maka asina ona entre RTTL ho ABC kona-ba troka kontíudu no hanorin English liu husi televizaun,” hateten, Prezidente RTTL, José Belo.

José Belo hatutan, RTTL ho televizaun ABC sei asina akórdu kooperasaun iha área formasaun no kapasitasaun lian Ingles ba mídia sira iha Timor-Leste, inklui harii seksaun lian Ingles iha RTTL.

Sorin seluk, Lead International Development Public Affairs, Jo Elsom hateten, enkontru ho Xefe Estadu ne’e ko’alia liu kona-ba importánsia mídia no liberdade ba mídia nian, tanba mídia broadcasters nasional nia papel mak promove interese públiku nian nomos apoiu sidadaun sira atu asesu ba informasaun.

“Ami agradese tebes ho Prezidente. Ami ko’alia liga ba dezenvolvimentu mídia nian no oinsá atu servisu hamutuk mídia iha Timor hodi harii kapasidade no “skill” ho matenek ne’ebé ami iha, nomos ami sei aprende buat balun husi mídia iha Timor, nune’e bele kria relasaun iha lian jornalizmu,” tenik Jo.

Entertantu, Jo Elsom mós agradese ba Prezidente Repúblika, José Ramos-Horta bele disponibiliza nia tempu hodi hasoru malu no sira husi televizaun ABC.

Jornalista  : Vinsensius Saldanha