Telkomcel Hakarak Dili Ne’ebe Moos & Konfortável
SAPNewsTL, Dili : Relasiona ho licu ne’ebe komunidade sira soe arbiru hodi mota lori ba tasi, iha ne’ebe halo foer sira namkari iha tadi-ibun, Funsionáriu Telkomcel Timor-Leste deside hala’o limpeza iha area ne’ebe konsideradu foer
Iha intervista, Jerente Telkomcel Joana Pereira Miranda haktuir, Telkomcel hanoin hamutuk no deside halo limpeza ida tanba kuaze ke komunidade sira barak soe foer arbiru hodi hafoer tasi ibun sira iha area praia do quoqueiros to’o area embaixada China nia oin.
“Ami hanoin hamutuk deside hodi halo limpeza ida tanba ami haree katak komunidade sira soe foer arbiru, ikus mota lori mai tasi hodi hafoer ambiente tasi ibun nian, liliu tasi ibun praia dos quoqueiros nakonu ho lixu ne’ebe estraga imagen sidade Dili nu’udar kapital nasaun nian”. Tenik Jerente Telkomcel Joana Pereira Miranda ba SAPNews iha Praia dos Quoqueiros Pantai Kelapa Dili, 04/04/2024.
Jerente Telkomcel ne’e hatutan, lixu ne’ebe komunidade sira soe hanesan plastik, kalen e butir, lixu hirak ne’e estraga ambiente Timor Leste nian.
Telkomcel tanesan emprezáriu internasionál ida ne’ebe hala’o investimentu ba area telekomunikasaun iha Timor, maibe Telkomcel la’os deit halo negosiu, maibe senti iha responsabilidade mos oinsa kontribui ba dezenvolvimentu iha setor sosial, ambiental no seluk tan.
“Telkomcel laos deit halo negosio iha Timor maibe iha responsablidade hodi kuidadu ambiente tanba Dili mos nu’udar setor turismo ne’ebe bele atrai turista domestiku no turista internasional sira, wainhira sira mai vizita Timor-Leste”.
Joana pereira dejeza, “se ema hotu iha ona konsiénsia moral, hodi la soe foer arbiru no asegura ambiente ne’ebe moos no saudável, maka sidade Dili sei sai furak, matak, moos no diak ba sidadaun nadionál no estrangeiru iha futuru”.
“Ita hotu presiza iha konsensia moral hodi soe lixu iha lixeira no kuidadu ita nia ambiente limpu, nune’e Dili bele sai matak, furak no konfortavél ba ema hotu iha futuru”. Nia dehan.
Partisipa iha atividade limpeza ne’e, mai husi funsionáriu no staf sira iha emprezáriu Telkomcel, limpeza ne’e hamos husi area embaixada Malaysia to’o Embaixada China.
Jornalista : António Tilman