Komunidade Musulmanu Hakarak Timor Metin Ho Fé & Damen
Imajem : Presidente Conselhu Fundasaun Masjid Anur Abdullah Said Sagrauh iha masjid Anur Timor-Leste, Qurta-Feira,(10/04/2024)
SAPNewsTL,DILI- Komunidade Musulmanu festeza loron EID AL Fitr 1445H, Objetivu husi selebrasaun ne’e hodi hasa’e no hametin fé ba Nai Maromak, nune’e bele kria damen mundu.
Presidente Conselhu Fundasaun Masjid Anur Timor-Leste Abdullah Said Sagrauh katak ohin loron bo’ot ba musulmanu sira tanba jejum durante fulan ida(1), tomak ne’e hanesan formasaun atu muda sira nia ann, no hasa’e no hametin fé ba Na’i Maromak.
“Ita tenke hamtauk ba Nai Maromak hodi halo buat ne’ebe mak los no hakbesik ann ba Nai Maromak, Ba komunidade Islamiku hotu mantein nafatin no konsistente hodi hasa’e fé no labele halo buat ne’ebe mak la kondisiona ho ita nia fé”.Dehan Presidente Conselhu Fundasaun Masjid Anur Abdullah Said Sagrauh ba jornalista sira iha masjid Anur Timor-Leste, Qurta-Feira,(10/04/2024)
Nia esplika katak husi Jejum ne’ebe mak komunidade musulmanu hala’o durante fulan ida(1) ne’e hodi hametin ho hasa’e kapasidade fiar nian hodi kontribui paz iha Timor-Leste.
“Iha tinan ida ne’e ho jejum ne’ebe mak ita halo ne’e atu hasa’e ita nia kapasidade de fé, nune’e ita bele kontribui ba ita nia nasaun mesmu komunidade Islamiku ne’e memoria maibe labele halo att no estraga malu, ita ne’e hanesan forsa ida, tan ne’e ita rekopera ita nia ann atu ita bele servisu hamutuk ho komunidade sira seluk”. Nia dehan
Presidente fudansaun Masjit ne’e parabeniza komunidade Islamiku sira ne’ebe mak kumpri jejum durante fulan ida(1), tanba sira sai hanesan vitoria ne’ebe bele hetan ksolok iha moris.
Abdullah Said Sagrauh haktuir katak komunidade musulmanu kria relasaun diak ho ema hotu-hotu espesial ba komunidade katolika tanba ne’e iha IX governu ne’e bolu lider religius sira atu hamutuk hodi hari’i organizasaun fraternidade umanu ne’e hamutuk hodi kria Paz ba mundu.
Iha fatin hanesan komunidade Musulmanu Afonsu Lopes salienta katak husi loron EiD Al-fitr ne’e hodi hametin liu tan unidade no paz ba ema hotu-hotu iha mundu rai-klaran.
“Selebra Loron Idul Fitri ne’e atu hametin unidade no paz ba ema hotu, tanba nasaun atu la’o ba oin ne’e ita presiza iha paz no estabilidade.”
Festa Idul Fitri ne’e hetan partisipasaun maksimu husi komunidade musulmanu sira iha kapital Dili, entretantu komunidade musulmanu sira iha kada munisipiu mos selebra loron ne’e iha ida-idak nia munisipiu.
Jornalista : Marcela Mery da Costa