Timoroan Presiza Kuidadu Ho Lafaek Foun, Atu Keta Tata Nia Kultura, Fiar & Ksolok

SAPNewsTL, Vatikanu : Papa Francisco hateten nia hadomi povu Timor-Leste, povu ne’ebé simples, familiar no ksolok tebes, Nia husu atu kuidadu ho lafaek sira ne’ebé atu estraga kultura armonia entre Timoroan.

Ligadu ho liafuan ne’ebé ko’alia kona-ba Lafaek, Papa Francisco define katak lafaek ne’e kona ba ideia oioin ne’ebé mai hosi liur ka kultura foun ne’ebé mosu hodi estraga sira nia armonia no kultura moris nian.

“Bainhira ha’u ko’alia kona-ba lafaek sira, ha’u ko’alia kona-ba ideia sira ne’ebé bele mai hosi li’ur hodi estraga armonia ida-ne’e ne’ebé povu Timor iha”. Hateten Santu Padre Papa Francisco

Santu Padre ne’e husu Timoroan sira atu kuidadu ho lafaek sira no labele besik tanba bele tata no estraga kultura Timor nian.

“Imi iha mós lafaek sira, iha tasi-ibun sira be furak ne’e iha lafaek barak iha laran, sira nani hakmatek mai tasi-ibun, kuidadu ho lafaek sira tanba bainhira sira tata sei la namkore, imi kuidadu ho lafaek sira ne’e tanba lafaek sira ne’e sei mai han buat hotu no han mós imi nia kultura, imi sei kuidadu imi nia an atu labele besik ba lafaek sira ne’e”.

Francisco husu ba sarani sira hodi mantein sira nia fiar no istória, tau matan ba joven sira no ferik katuas sira hodi hakat hamutuk ba oin ho esperansa.

“Mantein imi nia kultura no istória, mantein imi nia fiar, ha’u dezeja ba imi atu iha paz, oan barak, hamanasa barak, tau matan ba joven sira tanba sira mak futuru no tau matan ba ferik katuas sira tanba sira mak memoria, obrigadu ba imi nia fiar no domin, imi sei la’o nafatin ba oin ho esperansa”. Tenik Papa Francisco iha Tasi-Tolu,10/09/2024

Xefe Estadu Sante Sé ne’e deklara nia vizita Timor-Leste tanba ninia povu ho nia joven sira, buat ne’ebé diak no furak liu iha Timor-Leste mak ninia povu sira.

“Ha’u hanoin hela katak mai iha Timor ne’e buat ne’ebé furak liu la’os tanba ninia sândalu ka buat seluk, maibé uluk knana’in tanba nia povu”.

“Buat ne’ebé diak liu husi povu ida ne’e maka ninia foinsa’e sira, povu ida ne’ebé iha joven sira, povu ne’e iha futuru”.

Iha sorin seluk, Santu Padre dehan nia laran monu ona ba povu Timor-Leste, povu ne’ebé simples, familiar no ksolok tebes.

“Timor-Leste iha kultura ne’ebé simples, familiar no ksolok ne’ebé sai kultura moris nian, iha oan barak no barak teb-tebes. Ha’u sei hatete tan buat ida, ha’u nia domin monu ba Timor-Leste, ha’u hadomi Povu Timor-Leste.” dehan Santu Padre

Fo hanoin fali katak, Papa Francisco konklui ona ninia visita ba Ázia no Oseánia nian, orseik fila hikas ona husi Nasaun Singapura ba Vatikanu.

Jornalista : Marciana Da Conceição