Tinan Oin, Guvernu Apoia Universidade Privadu ! UNTL Tenki Servisu Maka’as

SAPNewsTL, Dili : Durante Partisipa iha serimonia graduasaun ne’ebe UNTL hala’o ba dala XXIX ba graduadu hamutuk 1554, Ministru Ensinu Superior, Siensia no Kultura (MESSK) Jose Honorio da Costa Perreira Jerónimu hateten, Tinan 2024, Nonu Guvernu konstituisional sei apoia universidade privadu sira tanba ne’e nia UNTL hodi servisu makaas.

Ministru Ensinu Superior, Siensia no Kultura (MESSK) Jose Honorio da Costa Perreira Jerónimo haktuir tinan 2024, Governu sei apoia universidade privadu sira iha Timor Leste tanba ne’e nia parte husu ba Estrutura UNTL hodi servisu makaas lori UNTL ba oin.

“Universidade privadu sira mos governu sei atribui apoiu ruma ba sira, governu sei hahu iha tinan 2024, tanba ne’e UNTL tenki prepara an, se lae universidade privadu sira sei diak liu ita, tanba governu hanoin ona atu apoia sira”. tenik Ministru Ensinu Superior, Siensia no Kultura (MESSK) Jose Honorio da Costa Perreira Jerónimu liu husi nia diskursu iha Auditorium Fakuldade Engenaria Ciensia no Teknolojia, UNTL Hera, 23/11/023

Ministru ne’e mos husu Ema intelektual hotu iha UNTL hodi loke an ba malu hodi hatudu los dehan los no sala dehan sala hodi servi UNTL ba futuru.

“Loke liman ba malu, tenki diak ba malu ho diak, labele diak iha ibun deit iha kotuk la diak fali, ha’u dehan ba matenek barak katak los dehan los no sala dehan sala, diak dehan diak, labele dehan diak iha kotuk ladiak fali, verdade laiha, tanba ne’e tenki nakloke ba malu, Ha’u sei mai UNTL hodi ko’alia ho estrutura, oinsa melloria UNTL, UNTL nia kontribuisaun boot maske uituan maibe boot ba rai ida ne’e”.Jose Honorio hateten

José Honorio mos kongratula graduadu sira hotu, husu atu nafatin iha vontade hodi aprende hodi fo nia kontribuisaun pessoal no profisional ba nasaun.

“Parabens ba imi, kontinua aprende ho vontade ne’ebe imi iha hodi fo imi nia kontribui pessoal no profisional ba nasaun, ita mos haree ema tama mai barak sai uituan ne’e problema ida mos, mais ne’e la’os professor sira nian sala deit, dejafiu mai oin sei barak, kontinua aprende ba oin hamutuk”. Nia husu

Ministru Ensinu Superior, Siensia no Kultura (MESSK) ne’e hatutan Timor Leste nia situasaun difisil tebes tan ne’e konvida Timor oan hotu hamutuk dezenvolve nasaun ne’e ba futuru.

“Timor Leste nia situasaun difisil, difisil teb-tebes, se ita boot sira hotu akompanha, tanba ne’e ita presiza hamutuk hodi dezenvolve ita nia rain. tanba ita nia nasaun hasoru situasaun ne’ebe difisil tebes”, dehan Ministru.

Jornalista : Jonh Marito