Guvernu Konsidera UNTL Nia Kontribuisaun Boot, Maibe Seida’uk To’o
SAPNewsTL, Dili : Durante Partisipa iha serimonia graduasaun ne’ebe UNTL hala’o ba dala XXIX ba graduadu hamutuk 1554, Ministru Ensinu Superior, Siensia no Kultura (MESSK) Jose Honorio da Costa Perreira Jerónimu konsidera UNTL kontribui boot liu maibe seidauk to’o, presiza kontribui nafatin.
Ministru Ensinu Superior, Siensia no Kultura (MESSK) Jose Honorio da Costa Perreira Jerónimu haktuir Timor Leste nia situasaun difisil tebes tan ne’e konvida Timor oan hotu hamutuk dezenvolve nasaun ne’e ba futuru.
“Timor Leste nia situasaun difisil, difisil teb-tebes, se ita boot sira hotu akompanha, tanba ne’e ita presiza hamutuk hodi dezenvolve ita nia rain. tanba ita nia nasaun hasoru situasaun ne’ebe difisil tebes”, tenik Ministru Ensinu Superior, Siensia no Kultura (MESSK) Jose Honorio da Costa Perreira Jerónimu liu husi nia diskursu iha Auditorium Fakuldade Engenaria Ciensia no Teknolojia, UNTL Hera, 23/11/023.
Governante ne’e konsidera UNTL (Universidade Nasional Timor Lorosa’e) nia kontribuisaun makaas ba dezenvolvimentu nasional liu husi produsaun rekursu humanu iha Timor Leste
“UNTL nia kontribuisaun boot ba dezenvolvimentu nasional, UNTL nia kontribuisaun ba formasaun dezenvolvimentu rekursu humanu ne’e makaas, ne’e importante, mais seidauk to’o no presiza tan. Tanba ne’e husu ba UNTL kaer graduadu sira ne’ebe iha valor akademiku diak hodi kontinua fakuldade no universidade ne’e ba oin, ita nia jerasaun presiza apoia malu hodi lori nasaun ne’e ba oin”. Ministru Sublinha
Ministru Ensinu Superior, Siensia no Kultura (MESSK) Jose Honorio da Costa Perreira Jerónimo mos husu ba estrutura UNTL hodi servisu makaas, nune’e UNTL bele sai diak no diak liu tan ba oin hodi kontribui ba dezenvolvimentu nasional.
Enkuantu, serimonia solene graduasaun ba dala XXIX ba graduadu 1554 ne’e prezide husi Maginifiku Reitor UNTL João Soares Martins durante loron rua (23-24/11/023) ba Fakuldade 10 iha Univeridade Nasional Timor Lorosa’e.
Jornalista : John Marito