Traballador Saturnino Hetan Asidente & Lakon Vida, Husik Hela Fen No Oan Iha Corea Sul

Imajem : Idelfonso Saturnino dos Santos

SAPNewsTL, Corea Sul : Ohin, akontese asidente tráfegu iha area Propinci Geongido Area whaceong Tebudo, iha ne’ebé rezulta traballador timoroan ho naran Idelfonso Saturnino dos Santos lakon vida tanba soke malu ho karreta.

Daniel da Silva – SAP News Agency

Traballador Timoroan Idelfonso Saturnino dos Santos ba Korea Sul iha tinan 2022, ohin dadersan ho motor atu ba servisu mak hetan asidente iha dalan, karreta soke nia to’o rezulta vítima iis kotu, iha area Provísia Geongido Area whaceong Tebudo, Corea Sul.

‎Tuir informasaun komfirmadu ne’ebe SAPNews asesu hosi Asistente Adidu Timor-Leste iha Corea Sul, Sebastião José Coli Soares haktuir katak asidente ne’e akontese duni no oras ne’e ekipa iha ona terenu hodi ba haree mate-isin iha ospitál.

“Ami iha hela terrenu, ami ba ona fatin akontesimentu no hospital hodi haree ona isin mate”. Informa Asistente Adidu Timor-Leste iha Corea Sul, Sebastião Jose Coli Soares ba SAPNews Pro liu hosi via WhatsApp iha Corea Sul, 24/06/2026.

Tuir kronolojia ne’ebe fo sai hosi adido traballador haktuir katak iha dadeer ne’e, entre oras 06:30 to’o 06:50, matebian hetan asidente iha área Daebudo, besik fatin ne’ebé nia hela.

Tuir informasaun ne’ebé simu, iha momentu akontesimentu, matebian lori motor ba fatin servisu. Depois, nia fila fali ho motor ba uma atu foti buat ruma. Iha dalan, iha kruzamentu ida, akontese kolizaun(Soke) entre motor ne’ebé matebian lori ho veíkulu ida.

Tuir informasaun ne’ebé disponivel, prosesu investigasaun sei hala’o husi autoridade polísia Repúblika Korea atu determina ho klaru kronolojia kompleta no responsabilidade kona-ba asidente ne’e.

Depois investigasaun remata, autoridade kompetente sei fó informasaun ofisiál ba parte relevante sira, inklui Embaixada Repúblika Demokrátika Timor-Leste iha Repúblika Korea.

Embaixada Repúblika Demokrátika Timor-Leste iha Repúblika Korea, liu husi Ekipa Adidu Traballu tun direta ba fatin akontesimentu no hospital haree no halo atendimentu ba isin-mate.

Naran kompletu matebian mak Idelfonso Saturnino dos Santos. Nia moris iha Laga, Baucau, iha loron 6 fulan Jullu 1993. Matebian mai husi família ida ne’ebé iha maun ho alin na’in 8, kompostu husi mane na’in 4 no feto na’in 4, no matebian mak mane boot iha família.

Nia inan Inacia, no nia aman, Paul dos Santos, nia Aman mate ona iha tinan 2019. Iha aspetu familiar, matebian iha estadu kazamentu. Nia hari’i família iha tinan 2024 no hela ho nia parseira, ne’ebé sira iha oan feto ida.

Matebian ba Repúblika Korea hala’o atividade laboral iha loron 28 fulan Fevereiru 2022, liuhusi programa empregu ba traballador estranjeiru.
Durante tinan tolu resin iha Repúblika Korea, matebian servisu iha kompanhia Hyunsusan, ne’ebé lokaliza iha área Seocheon-gun, Provínsia Chungcheongnam-do.

Iha fulan Outubru 2025, matebian sai husi sistema empregu anterior no hahú servisu iha kompanhia foun, naran Songbeksusan, ne’ebé lokaliza iha área Daebudo, Provínsiya Gyeonggi-do, to’o akontese kazu asidente ne’e.

Tuir mai, prosesu atendimentu no repatriasaun, Embaixada Repúblika Demokrátika Timor-Leste iha Repúblika Korea, liuhusi Ekipa Adidu Traballu, hamutuk ho SEFOPE, halo ona komunikasaun no koordinasaun ho entidade relevante sira kona-ba prosesu atendimentu no translada isin-mate ba família matebian iha Timor-Leste.

Prosesu kona-ba dokumentasaun no preparasaun translada isin-mate sei kontinua tuir prosedimentu ne’ebé aplikável, ho objetivu atu garante katak matebian nia Isin-mate sei translada mai Timor-Leste.