UNEUMER & MOFA Husu PR Horta Tenki Anula Desizaun Indultu
SAPNewsTL, Dili-Uniaun Estudante Universitariu Munisipiu Ermera (UNEUMER) no Movimentu Foinsa’e Atsabe (MOFA ),kontra total desizaun Presidente da Republika José Ramos Horta ne’ebe fo indultu ba Eis Ministra finansas Emilia Pires no Madalena Hanjam liu husi dekretu lei nú 20/2023, 12 Dezembru.
Relasiona ho desizaun ne’ebe Prezidente da RDTL, José Ramos Horta, fó indultu ba kondenada nain rua hanesan Sra. Emilia Pires no Madelena Hanjan bazeia ba Dekretu do Prezidente da Repúblika Nú. 125/2023, de 14 de dezembru, hodi liberta total sira nain rua husi responsabilidade kriminal.
Uniaun Estudante Universitariu Munisipiu Ermera (UNEUMER), hamutuk ho Movimento Foin-sa’e Atsabe (MOFA), konsidera estadu de direitu nakfilak ona ba estadu de poder tanba Presidente Repúblika uza nia poder hodi kontrola lei.
“Timor-Leste estadu de direitu ho prinsipiu supermasía da lei katak lei mak bot liu ema hotu no ema hotu hanesan iha lei nia oin. Maibé, saida mak akontese ohin-loron, estadu de direitu nakfilak sai estadu de podér katak sé mak kaer podér (ezemplu Prezidente) uja nia podér hodi kontrola lei” dehan Porta voz Zaqueu Maia Araujo ba jornalista sira iha Jardim 5 de Maio Dili, 21/12/2023
Organizasaun Juvenil rua ne’e konsidera lei númeru 20/2023 loron 12 fulan dezembru no dekretu Prezidente da Repúblika númeru 125/2023 14 de dezembru, nu’udar lutu hodi asegura koruptór sira.
“Fó indultu ba Emilia Pires ho Madalena Hanjam la kontribui ba kombate korupsaun, maibé loke dalan ba korupsaun buras liutan iha Timor-Leste tanba lei fo dalan atu prezidente bele fó indultu ba koruptór sira iha sa tempu de’it”. Nia sublinha
UNEUMER & MOFA deklara sira nia parte la aseita no diskorda total desizaun indultu refere tanba Presidente Repúblika fo komutasaun de pena la justu
“Ami kontra lei nu 20/2023 loron 12 fulan dezembru ne’ebé fó dalan ba Prezidente Republika fó indultu koruptór sein kriteria, ami kontra fó indultu ba naok-ten no nakar-ten nain rua ne’ebé halai ses husi justisa”.Nia lamenta
Porta voz ne’e mos husu ba Presidente Repúblika no Parlamentu Nasional hodi anula lei nú. 20/2023, loron 12 fulan dezembru hodi fo indultu ba povu kiik sira ne’ebe iha prizioneiru.
“Ami eziji ba Parlamentu Nasionál atu anula lei nu 20/2023, loron 12 fulan dezembru no mantein lei númeru 5/2016, loron-25 fulan-maiu, Ami eziji atu Prezidente Republika tenki anula desizaun fó indultu ba Emilia Pires ho Madalena Hanjam no fó de’it indultu ba prizioneiru ne’ebé nu’udar povu kiik. “Nia husu
Porta voz ne’e mos husu ba sosiedade sivíl, universitarius, traballadór, kamponeza, kiak sidade no povu Timor-Leste tomak, hamutuk unifika forsa hodi kontra Prezidente Republika nia desizaun fó indultu ba koruptór sira.
Entretantu, antes ne’e Presidente Republika Jose Ramos Horta klarifika ona katak desizaun ne’e mai husi inisiativa PR nian bazeia ba Konstituisaun RDTL artigu 85 alinea i no dekretu Lei nu. 20/2023 komutasaun de pena tanba razaun umanitaria no seluk tan.
Jornalista : Conzita Mota