Vise Ministru Saúde Afirma Sei Transforma Laboratóriu Nasionàl Saúde Sai Ekselente

SAPNewsTL, Dili : Laboratoriu Nasionàl, hetan visita husi Vise Ministru Saúde ba Operasionalizasaun Ospital (V-MSOO) Flávio Brandão Mendes hodi haree servisu no enkontru hamutuk ho Presidensia Intitutu Nasional Saúde Públika (INS-TL)

Hafoin visitasaun Vise Ministru ba Operasionalizasaun Ospital Flavio Brandao haktuir katak laboratóriu nasionál nu’udar parte ida husi Institutu Nasionál Saúde Públika (INS-TL) ne’ebe halo nia papel ida ne’ebe importante tebes atu suporta sistema ida ne’ebé di’ak iha servisu atendimentu.

Vise Ministru hateten mos katak alende supota sistema, iha futuru Laboratoriu nasional sai hanesan sentru informasaun kona ba saude epidemiologia

“Laboratóriu sei transforma hanesan sentru ida ne’ebe la’os de’it akomoda atende iha HNGV maibe mós servisu sientifiku sira, no mós bele garante saúde públiku ba ita nia sidadaun Sira”.

“Ba konsumu públiku nian hanesan hahán, bee, ida ne’e papel boot tebes ne’ebe mak laboratóriu nasionál sei halo no ba oin laboratorium mós sai hanesan sentru informasaun ida ne’ebe importante tebes ba ita nia nasaun kona ba saúde epidemiológia nian”Dehan Vise Ministru ba operasional ospital Dr.Flavio Brandao ba jornalista sira, iha Laboratoriu nasional, Quinta-feira(27/07/2023)

Alende visita laboratoriu nasional, Vise Ministru hala’o enkontru ho Prezidensiál INS-TL ho estrutura oinsa bele armoniza no rasionaliza servisu sira, atu ba oin bele iha mudansa

“Oinsá hare’e ba sira nia regulamentu internál hodi dezenvolve no moderniza laboratóriu, nune’e bele responde nesesidade ida ne’ebe mak agora povu no nasaun infrenta. Papel laboratóriu tenki sai ona husi rutinidade ne’ebe mak durante tempu naruk ita halo no laboratorium nasionál tenki transforma ba sentru ida ekselente.”Tenik nia

Nia saleinta katak laboratóriu refere hanesan fatin ida ne’ebe sei tau matan ba laboratóriu sira seluk iha teritóriu Timor laran tomak, ospitál rejionál sira no sentru saúde sira nune’e mos setór privadu sira ne’ebe mak halo nia prátika iha ne’e no hola papel importante ida oinsa asegura kualidade iha setor privadu sira

Jornalista: Marcela Mery da Costa