Wainhira Lidera Guvernu, PD Sei Loke Akademia PNTL No F-FDTL

SAPNewsTL, Aileu : Partidu Demokrátiku (PD) hala’o Komísiu iha Munisipiu Aileu, Presidente PD Mariano Assanami Sabino haktuir Wainhira PD manan, kaer governasaun no sai primeiru ministru mak sei kria akademia Polísia Nasionál Timor Leste (PNTL) no FALINTIL Forsa Defeza de Timor Leste (F-FDTL) hodi forma sira sai kualidade iha siensia polísia, sosial, ekonomia, administrasaun, no polítika

“Wainhira PD kaer governasaun, loke akademia ba PNTL no F-FDTL, hodi forma sira sai kualidade iha siensia polísia, sosial, ekonomia, administrasaun no polítika, tanba, wainhira sira to’o 50 anos, sira reforma ona, entaun sira bele halo servisu seluk”. Tenik Presidente PD Mariano Assanami Sabino liu husi diskursu, Iha Aileu Villa, 09/05/2023

Assanami hatutan, instituisaun hotu tenki forte hodi servi ba estadu, labele halo diskriminasaun iha PNTL, F-FDTL, Funsaun Públika nia laran, apoia no hadia ministériu públiku ho diak hodi justisa bele la’o diak

“Ita sei hari’i Tribunal no prokurador regional, kapasitasaun kontinua, Tribunal tenki sai konfiansa povu nian,  tribunal tenki sai forte, PNTL no F-FDTL ne’ebe sai lutu ba nasaun no seguransa ba povu ho diak, instituisaun hotu tenki forte hodi servi ba estadu, labele halo diskriminasaun iha PNTL, F-FDTL, Funsaun Públika nia laran, apoia no hadia ministériu públiku ho diak ”. dehan Assanami

PD mos sei garantia Polísia ne’ebe profisional, hala’o nia knaar tuir estatutu no konstituisaun, profisonaliza regularmente ho profisionalidade inklui polísia komunitária

“Polisia komunitariu tenki iha kreatividade, inovasaun hamutuk ho xefe suku no aldeia sira, para desenvolve suku hodi kria paz, alegria no estabilidade, ita tenki tau osan iha suku para desenvolve, arte marsial oioin tenki sai seguransa nasionál, ita hotu Timor oan,ita tenki hamutuk asegura liberdade ema ida-idak tanba ita nia ain, ita sosa ho 300.000 pessoas nia mate”. Hatete Assanami

Iha Parte seluk, Presidente PD ne’e afirma, PD hamriik hodi salva estadu, hadia parlamentu nasionál ne’e tenki sai fatin ba konsentrasaun ideia, hanoin ne’ebe atu halo desizaun polítika hodi lori moris diak, lei ne’ebe diak, hadia guvernu tanba guvernu lori ona ba guvernu partidu nian, guvernu ne’ebe haree ba kor no halo diskriminasaun, maibe guvernu tenki ba partidu hotu, guvernu ba sira ne’ebe iha partidu no laiha partidu

Jornalista : Ferderita Miranda