Hametin Rekonsiliasaun ! CNC & SEAK Sei Realiza Festival Iha Fronteira Bobonaro

SAPNewsTL, Dili: Festival Fronteira 2023 sei harame munisipiu Bobonaro husi loron 15 to’o 18 fulan novembru 2023, festival ne’e organiza husi Sekretariu Estadu Arte Kultura (SEAK) ho Centro Nasional Chega (CNC) suporta husi Ministériu Juventude Desportu Arte Kultura (MJDAK) no Sekretariu Estadu Komunikasaun Sosial (SEKOMS).

Tuir komunikadu SAPNewsTL asesu iha loron sesta 10/11/2023 katak Festival Fronteira 2023 ho tema rekonsiliasaun no interkambiu kulturál ho objetivu atu enkoraja jerasaun foun Timoroan hosi Timor-Leste no Timoroan sira iha Indonézia.

Objektivu husi festival ne’e hodi promove hanoin krítiku ba tópiku sira ne’ebé relasiona ho memória konflitu polítiku sira iha pasadu, fraternidade umanu, rekonsiliasaun no interkulturalidade iha rejiaun espesifikamente iha área fronteira Timor-Leste no Indonézia.

Promove kultura diálogu entre jerasaun foun sira iha Timor-Leste no Indonézia liu hosi produsaun konjunta ba kontiúdu sira istória no kultura liu hosi obra arte no literatura sira, promove interkambiu sai espasu ba kolaborasaun konjunta entre nasaun rua hodi kontribui ba balansu narativu istória.

Liu husi komunikadu informa, CNC no SEAK iha esperansa katak bainhira realizasaun festivál fronteira implementa haktuir objetivu sira iha leten, mak sei hamosu rezutadu espetativa sira hanesan tuir mai ne’e, forma ona pensamentu krítiku ba joven ka jerasaun foun sira relasiona ho kultura hametin dame liu husi rekonsiliasaun.

Iha ona kuñesimentu mútua entre jerasaun foun sira hosi nasaun rua hodi hamosu produsaun konjunta ba konteúdu sira kona-ba kultura no istória liu hosi obra arte literatura, bainhira liu hosi interkambiu kulturál, foinsa’e sira iha ona koñesimentu kona-ba istória tuir perspetiva parte hotu-hotu nian sei kontribui ba balansu narativu istória no kontribui iha prosesu simu malu no hari’i dame.

Komunikadu afirma tan, Festivál Fronteira 2023 sei realiza durante loron 4 (haat) iha loron 15-18 fulan Novembru 2023 no hala’o iha munisipiu Bobonaro, festivál ne’e sei hala’o liu husi palestra, kolókiu hatudu performa ka aprezentasaun arte ho karater kontemporaniu ho nia tema Rekonsiliasaun.

Atividade ba Festivál Fronteira 2023 sei priénse konferénsia / seminar ka kolókiu, vizita fatin Istóriku, desportu rekonsiliasaun entre delegasaun hosi Timor-Leste no delegasaun husi Timor Osidentál, Indonézia, performa Arte (Art Performance) partisipa hosi múziku sira hosi Timor-Leste no Indonézia no Street Art (Mural Painting): kolaborasaun komunidade Arte hosi Timor-Leste no Indonézia halo kampa.

Portantu Festivál Fronteira 2023 nu’udár instrumentu pas ho objetivu atu hametin lasu amizade entre Timoroan sira ne’ebé fahe malu tanba konflitu pasadu hosi tinan 1974 no hakotu iha tinan 1999 no hametin lasu amizade entre estadu rua, Festivál Fronteira 2023 projeta promosaun ba dame, fraternidade umana, valoriza diversidade no pluralidade kultura entre Timor-Leste no Indonézia.

Promove konetividade no empodera komunidade ka sosiedade sira liu hosi aspeitu kulturál no Istória ne’ebé refleta no inspira interasaun sosiál, bazeia ba prinsípiu respeita direitus umanus, toleransia no solidariedade umana no harii hikas kultura dame ne’ebé nia abut mai hosi fiar, matenek lokál, tradisaun, kultura no arte ne’ebé kontribui ba respeita valores umanu.

Eventu ne’e sai nu’udár plataforma ba múziku sira, grupu ka komunidade teatru, kuradores, eskritór, fotografer, jornalista, peskizadór no estudante sira iha Timor-Leste no Indonézia nomos sai prosesu interkambiu kulturál hodi hamosu komprensaun mútua no valorizasaun ba istória no diversidade kultura.

Reportajen: Augusto dos Santos