Hakarak Futebol Ba Oin ! Francisco Deklara Husik Kargu Prezidente FFTL
SAPNewsTL, Dili: Prezidente Francisco Jeronimo Ofisialmente rezigna an husi prezidente Federasaun Futebol Timor- Leste (FFTL) iha kongresu extraordinariu tanba hakarak integra fila fali ba asosiasaun sira hodi hili prezidente ida diak liu nune’e futebol Timor-Leste ba oin.
“Ohin ha’u tenke hatete katak, assosiasaun 21 sira nia hakarak hau tenke kumpre, tan ne’e, hau hanesan ema, hau husu deskulpa no perdaun, karik iha hau nia servisu ladiak halo asosiasaun sira hirus no halo ita oin buis ba malu, ohin, hau deklara katak hau, Francisco Jeronimo hanesan Prezidente FFTL ofisialmente rezigna hosi hau nia kargu”.
“Ha’u entegra fila fali ba asosiasaun sira hodi hili ida ne’ebe sira dehan diak liu tanba hau nia hakarak ita nia futebol tenki ba oin” dehan prezidente Francisco Jeronimo ba jornalista sira iha nia diskursu despedida iha kongresu extraordinariu FFTL iha otel Timor Colmera, Dili sesta (10/11/2023).
Francisco hatutan, nia fo agradese ba estrutura asosiasaun sira no husu obrigadu barak ba kooperasaun no hanoin diak durante mandatu iha tinan barak nia laran iha situasaun diak no at nafatin hamutuk no ohin tenke iha desizaun ba futebol iha Timor-Leste hodi lori orgullu ba futebol iha Timor-Leste.
Prezidente informa, hanesan ema ida iha kunesimentu ba futebal no servisu mos ba dezenvolvimentu futebol iha Timor-Leste, ohin termina ona mandatu iha federasaun, maibe nafatin iha kompromisiu no vontade nakonu ho espiritu paixaun ba futebol prontu atu kontribui ba se deit mak sei mai lidera FFTL tanba nia hakarak futebol iha Timor-Leste tenke la’o ba oin.
Nia afirma tan, razaun fundamental nia hakarak rezigna mak nia sai prezidente loron kalan asosiasaun sira dehan nia ladiak hanesan ema tenki rezigna husi kargu prezidente para fo fali oportunidade ba asosiasaun sira nia hakarak ne’e saida tanba maoria asosiasaun hatama ona karta ona atu demite nia.
Entretantu, iha kongresu extraordinariu ne’e laos prezidente deit mak rezigna an maibe iha mos membru ezekutivu ho naran Augusto Henrique nu’udar mos prezidente asosiasaun futebol munisipiu Covalima no rezignasaun prezidente ne’e entaun vise prezidente Maijor Jeneral Falur Rate Laek sei asume kargu prezidente interinu to’o loron 60 remata mak hili fali prezidente foun lidera fali FFTL ba periodu 2022-2026.
Portantu, FFTL sei halo eleisaun ba prezidente Foun iha loron 10 fulan janeiru 2023 hodi kontinua lori deportu Timor Leste ba futuru.
Reportajen: Augusto dos Santos