Mitiga Mudansa Klimátika ! APFTL & OXFAM Alerta Halo Reflorestasaun
SAPNewsTL,Dili : Alumni Parlamentu Foinsa’e Timor Leste (APFTL) no OXFAM realiza marsa ambiental husi Jardim Motael to’o Lesidere Dili, Presidente APFTL Zaulino Gomes da Silva hateten, Objektivu husi marsa ne’e hodi fo oportunidade ba joven sira hodi ko’alia sira nia ideia kona-ba luta ba Mudansa Klimátika iha Timor-Leste.
Presidente APFTL Zaulino Gomes da Silva haktuir Timor Leste hanesan Illa kiik ida, maibe hahu ona iha sensibilidade oinsa halo protesaun hodi konserva ambiente sira no mos fo moris ba ema hotu
“Alumni Parlamentu Foinsa’e Timor Leste hamutuk ho OXFAM ho entidade hotu kontinua alerta, ba krize klimatika ne’ebe mak fo impaktu ba ita hodi la hetan Anin fresku no la hetan bee, tanba ita sei hasoru bai-loron naruk iha futuru”. Dehan Presidente APFTL Zaulino Gomes da Silva ba liu husi nia Diskursu iha Lesidere, 9/11/023
Zaulino Gomes akresenta, iha prosesu konstrusaun estadu dala ruma estraga ai-horis ludun ida maibe sidadaun ida-idak sente iha responsabilidade hodi halo reflorestasaun (Kuda ai).
“Ita fo espasu ba dezenvolvinentu la’o maske estraga ai horis balu maibe Ita mos tenki hanoin refloresta oinsa kuda fali iha fatin seluk hodi halo balansu ba dezenvolvinentu”. Zaulino Gomes sublinha
Iha Fatin hanesan, Adilson da Cruz representante OXFAM hateten, OXFAM serbisu hamutuk APFTL hodi halao programa ho tipu oioin hanesan tipu ambiente no agrikultura hamutuk ho joven hotu ne’ebe iha Dili no Munisipiu sira.
“Ami mos serbisu hamutuk ho governu ne’ebe sempre apoiu ba ami Nia programa hotu, Liu husi talentu no kreatividade ne’ebe joven sira halo, tan ne’e ba oin tantu governu, parseiru dezenvolvinentu sira, ita hotu atu dezenvolve diak Liu Tan” Nia dehan
Adilson konsidera Mudansa Klimátika ne’e problema global ne’ebe sempre afeta ba balada kiik sira no mos ambiente inklui ema sira, Timor Illa ida kiik iha nasaun pasifiku maibe barak liu sofre husi krize klimatika ne’ebe akontese.
“Atu bele apoiu no asegura katak sosiedade reziliente liu hasoru problema krize klimátika hanesan bee la iha, Ita bele uza ita nia matenek rasik” Nia Akresenta
Enkuantu, Programa refere OXFAM serbisu hamutuk ho APFTL no jovem sira, Adilson konsidera APFTL nu’udar rede organizasaun foinsa’e ne’ebe mak ho ideia diak hodi hadia desenvolvimentu.
Partisipa iha marsa ambiental ne’e partisipa husi Representante OXFAM, Membru APFTL, Organizasaun voluntáriu sira, estudante universitáriu sira hanesan UNTL, UNPAZ, UNITAL inklui entidade sira seluk tan
Jornalista : Marcella Mesquita Lemos