Mélio Promete Halo Lautém Hader & Hakotu Divergénsia

SAPNewsTL, Lautem: Presidente Autoriedade Munisipiu Lautém (PAM-Lautém) Mélio de Jesus hateten Munisípiu Lautem iha nia história rasik, história ne’ebé hakerek iha pájina rezisténsia nasionál ba libertasaun nasionál ninian katak o ponta leste celeiro da nação ne’ebé sai nu’udár armazén no baze lojístika ba ita nia rezisténsia nasionál hodi hasoru okupasaun.

Ta ne’e iha tempu ukun rasik an povu Munisípiu Lautem labele taka an iha vidru laran hodi hateke de’it ba liur lakohi kore an ba haree prosesu dezenvolvimentu, lautem tempu ona hodi hader husi ekonomia, sosial no infraestrutura.

“Hó nomeasaun ida ne’e hanesan konfiansa ida husi guvernu hodi ha’u sai servidór povu nian iha Munisípiu Lautem, nune’e ohin loron ha’u mai hamrik iha ita bo’ot sira nia oin, mai hó simbolu ida katak Lautem hadér, Lautém hadér husi ekonomia, Lautém hadér husi infra-estrutura, edukasaun, saúde, agrikultura, turizmu, industria no seluk-seluk tan”. Dehan PAM Lautem Empossadu Mélio de Jesus liu husi nia diskursu iha Salaun Administrasaun Munisípiu Lautem, Tersa-Feira, 5/03/2024

PAM Lautem empossadu ne’e hatutan ho nomeasaun ne’ebé nia simu husi guvernu ne’e hanesan fo responsabilidade ba nia atu serví hodi konkretiza aspetu libertasaun nasionál hodi liberta povu Munisípiu Lautém.

“Ne’e nu’udár responsabilidade moral ida mak ha’u atu kontinua no konkretiza aspetu libertasaun nasionál hodi liberta povu Timor-Leste liu-liu povu Munisípiu Lautém”. Tenik PAM Lautém Mélio

PAM Lautém Mélio haklean iha dinámika prosesu konstrusaun estadu prosesu dezenvolvimentu nasionál dala barak hasoru dezafiu no obstákulu oi-oin tantu husi nível nasionál to’o iha nível Munisípiu espesial iha Munisípiu Lautém.

“Ohin ha’u simu posse ida ne’e ho responsabilidade no komitmentu katak nia tempu ona iha Munisípiu Lautem aslera dezenvolvimentu infra-estrutura ne’ebé justu, ekilibriu no sustentavél, hasa’e kampu traballu hodi kria sentru ekonomia kreativu bazeia ba potensialidade suku sira mak hanesan dezenvolve no promove seitor agrikultura, turizmu, indústria, arte no kultura”. PAM Mélio salienta

PAM Mélio informa hanesan servidór nia sei hadia atendementu ba publiku ne’ebé transparente, responsivu nomos hadia sosiedade ne’ebé prosperu inklui hadia partisipasaun juventude iha ekonomia dijital.

“Melhora partisipasaun juventude independente, profissional nune’e mos iha partisipasaun aktiva iha ekonomia dijital, melhora atendementu públiku ida ne’ebé transparente, responsivu, kualidade no asesivu, melhora sosiedade ne’ebé prosperu, espiritual garante prinsípiu valores nasionalizmu, relijouzu, demokrasia, kultura no ambiental”. Mélio fundamenta

Mélio mos iha esperansa katak entidade hotu ne’ebé iha Munisípiu Lautem sei kolabora hodi foti Munisípiu Lautem sai Munisípiu ne’ebé kompetetivu.

“Ha’u espera katak ho komitmentu ida ne’e hamutuk ho entidade hotu-hotu ne’ebé hala’o nia misaun iha Munisípiu Lautém atu ita kolabora no koopera ba malu nafatin hodi bele eleva ita nia Munisípiu Lautem sai Munisípiu ida ne’ebé proaktivu, kompetetivu liu husi aslera no kontribui ba prosesu dezenvolvimentu sustentavel”. PAM Lautem Sublinha

PAM Lautem foun ne’e afirma tempu to’o ona ba Povu Lautém atu haluha no hakotu ninia diverjénsia polítika hodi labele haree ida-idak nia kor partidu, interese pesoal, grupu, étniku, rasa, relijiozu no Sukus.

“Mai ita hamutuk fo liman ba malu no hanoin ida de’it, espíritu ida de’it atu tane a’as interese povu nian iha Munisípiu Lautém hodi lori sira ba hetan moris di’ak”. Nia husu

Nia mos nakloke ba ema intelektual Lautem oan nian atu bele hato’o nia aspirasaun no ideias konstrutivu hodi konsentra ba dezenvolvimentu Munisípiu Lautem.

“Ba povu Lautem tomak nia di’ak ha’u nakloke an ba maluk intelektual Lautem oan sira, sosiedade sivil, veteranus sira, relijiozu sira ne’ebe hela iha Munisípiu Lautem, iha rai liur no iha fatin ne’ebe de’it nomos ha’u nia konsentrasaun espesial ba maluk ema ho defisiensia sira hahú ohin ba oin nu’udár servidór Povu Munisípiu Lautem, ha’u prontu hodi hein imi nia aspirasaun no imi nia krítikas konstrutivu durante iha ha’u nia mandatu”. Katak nia

Iha serimonia ne’e administrador postu administrativu sira hanesan Iliomar, Tutuala, Lospalos, Lore, Luro no Lautém mos simu ona tomada de posse husi Vise Ministru Administrasaun Estatal.

Entretantu, serimonia tomada de posse ne’e fo husi Vise Ministru Administrasaun Estatal Jacinto Rigoberto no partisipa husi Ministru Interior, Ministru Justisa, Sekretariu Estadu Floresta, Sekretariu Estadu Kooperativa, Komisaun Funsaun Publika, Prokurador Jeral, Komandante PNTL Munisípiu Lautem, Veteranus, Padre no Madre sira no Familia sira

Jornalista: Luis Pailofo