Otèlio Konsidera Média Ofiser Ne’e Porta Voz Governu

SAPNewsTL,Dili: Durante sosializasaun Lei Komunikasaun Sosiál ba Media Ofisial sira, Prezidente Konsellu Imprensa (KI) Otélio Ote konsidera Media Ofiser hanesan Portavos Ministériu nian hodi hato’o informasaun ba públiku.

Prezidente Konsellu Imprensa Timor-Leste (CI),Otelio Ote katak Konsellu Imprensa sosializa lei komunikasaun sosial ba Media ofisial sira liliu lei sira kona ba meiu komunikasaun sosial.

“Ohin sei realiza atividade sosializasaun Lei Komunikasaun Sosiál no Regulamentu Direitu Resposta no Direitu Retifikasaun ba pesoal sira ne’ebe hala’o kna’ar nu’udar ofisial relasaun publika ka Ofisial Media iha Liña ministerial no entidade Administrativa indireta sira, semana ida ka rua liu ba ita mos halo sosializasuan ita nia ekipa nia ekipa Conselho Imprensa sei esplika detaillu kona ba lei komunikasaun sosial enjeral mos espesial kona ba artigu ida ne’ebe ko’alia direitu ba resposta no mos direitu retifikasaun”. “Dehan Prezidente Konsellu Imprensa Otelio Ote liu husi diskursu iha salaun CI Balide-Dili, Kinta-Feira, 7/03/2024

Prezidente KI hatutan iha meius komunikasaun sosial media ofisial nu’udar portavos hodi hato’o informasaun ba publiku.

“Media ofisial nu’udar portavos ba governu, ita bo’ot sira iha pozisaun ida ne’ebe importante tebes tinan barak ona ita iha nasaun ida ne’ebe independenti, soberanu no kompleta nia estrutura tomak iha governu, ita nia papel husi meius komunikasaun sosial iha Ministru sira nu’udar portavos, nu’udar ema ne’ebe hato’o informasaun dala barak mos ba públiku ita senti seidauk kompletu ou di’ak liu tan”. Tenik Prezidente KI

Prezidente Otélio Ote aumenta lei komunikasaun sosial foin mosu iha 2014 depois Konsellu Imprensa foin estabelese iha 2016 maibe tama ona faze harii haburas no hametin.

“Durante iha tinan hirak nia laran iha periodu rua ida ne’e ami serbisu makas primeiru atu estabelese instituisaun ida ne’e, tinan tolu dahuluk ita hari’i, kunese konsellu imprensa agora tinan tolu daruak ita tama ona iha hametin konsellu imprensa, ita tama ona iha tinan daneen entaun tinan oin ita tama ba periodu datoluk ami mos remata mandatu iha Fevereiru 2025, ita tama ona iha periodu ida haburas, no hametin”. Prezidente Otélio informa

Prezidente Otélio haktuir Konsellu Imprensa buka nafatin parseria ho Media sira atu nafatin fahe informasaun ba publiku.

“Agora ita buka hametin relasaun espesial ba Konsellu Imprensa ho Media ofisial sira ho hamutuk hametin fali instituisaun Media scira no parseiru sira no Jornalista sira, ita nia korenti ida ne’e tenki metin duni atu ita bele hatan ba publiku liu husi informasaun sira ne’ebe publika iha Media sira tantu informasaun sira ne’ebe Media sira maka buka rasik ou informasaun sira ne’ebe maka ita serbisu nain ba meius komunikasaun sosial iha Governu divulga rasik”. Nia informa

Otélio salienta Media Ofisial sira tenke klarifika ba publiku wainhira publiku ladun komprende publikasaun sira ne’ebe fo sai bele hatan iha loron tolunulu nia laran.

“Direitu resposta maka hanesan publikasaun sira karik publiku sira ladun komprende Ministru nia publikasaun hanesan kona-ba dadus ruma kona-ba informasaun ruma ne’ebe los no la los ne’e ita bo’ot sira iha direitu ba resposta sei esplika, presiza loron tolunulu ita hato’o ita nia direitu ba resposta husi Ministru kona ba notisia ruma Ministru nian, durante loron tolunulu Media ofisial sira tenki hatene ezerse no fo sai ita nia superior atu hatan lais publikasaun sira ne’ebe karik halo ita la kontenti”.

Prezidente ne’e afirma wainhira iha problema publikasaun, parte rua presiza rezolve liu husi prosesu direitu resposta no direitu retifikasaun.

“Direitu retifikasaun ne’e mos hanesan Media ofisial sira halo komunikadu ida ne’ebe halos informasaun ne’ebe karik la los ne’e depende husi serbisu nain meius komunikasaun sosial, servisu governu ne’e sistema ida ne’ebe iha rasik nia regras bele halo konseitu aprezenta no aprova selae superior mak halo konseptu ou halo konferensia imprensa ida atu halos tiha notisia sira atu problema sira ne’ebe maka kona iha konteudu Jornalistiku, ita rezolve liu husi prosesu direitu resposta direitu retifikasaun”. Katak nia

Jornalista : Ermelinda Soares