CONTL-CDTL Seidauk Rejistu Atleta TL Kompete Olimpiade 2024
![](https://sapnewstl.com/wp-content/uploads/2024/03/IMG-20240320-WA0042-650x292.jpg)
Imajem : Prezidente CONTL Macario F. Sanches, iha salaun Luz Clarita Bairro Formosa, Dili kuarta (20/03/2024).
SAPNewsTL, Dili: Komite Nasional Olimpiku Timor-Leste (sigla portuges CONTL) ho Konfederasaun Desportu Timor-Leste (sigla portuges CDTL) seidauk rejistu atleta Timor-Leste (TL) ba kompete iha olimpiade 2024 iha sidade Paris, Fransa tanba atleta sira sei tuir hela pra kualifikasaun mak sei remata iha fulan abril tinan ne’e.
“Ita nia atleta husi federasaun natasaun, atletizmu, taekwondo, badminton no weightlifting sei tuir hela pra kualifikasaun, ita hein iha fulan abril nia laran sira remata pra kualifikasaun depois mak foin ita hare’e rezultadu se mak bele ba tuir jogu olimpiku 2024 iha sidade Paris, Fransa tan ne’e agora sira seidauk rejistu atleta ba kompete olimpiade 2024”, dehan Vise Prezidente CONTL Vicente Carvalho ba jornalista sira iha salaun Luz Clarita Bairro Formosa, Dili kuarta (20/03/2024).
![](https://sapnewstl.com/wp-content/uploads/2024/03/IMG-20240320-WA0041-1-650x292.jpg)
Vise prezidente hatutan, jogu olimpiku ne’e atleta sira tenki tuir pra kualifikasaun determina atleta se mak atu kompete tanba diferente ho Sea Games no Asian Games, karik atleta nain lima ne’e la pasa iha pra kualifikasaun ne’e, modalidade atletizmu ho natasaun ne’e obrigatoriu ona tenki partisipa olimpiade tanba hetan wildcard, nain tolu seluk CONTL sei halo karta ba IOC tanba nain tolu ne’e daudaun hetan bolsa husi Olimpic Solidarity halo treinamentu iha rai liur durante tinan rua ho balun nune’e atleta Timor-Leste posibilidade liu nain tolu kompete olimpiade 2024.
Iha sorin seluk, Prezidente CONTL Macario F. Sanches hatete, lista final ba atleta sira ba kompete olimpiade daudaun ne’e CPNTL seidauk iha tanba daudaun ne’e atleta sira kompete hela iha pra kualifikasaun.
“Lista final ba atleta sira ba kompete olimpiade daudaun ne’e ita seidauk iha tanba agora ne’e atleta sira kompete hela iha pra kualifikasaun karik sira manan iha pra kualifikasaun mak sira hetan kartaun ba kompete olimpiade tanba jogu olimpiku diferente ho Sea Games”, tenik Macario
Prezidente CDTL ne’e informa tan, preparasaun atleta ba kompete olimpiade 2024 iha Fransa depende ba atleta Timor-Leste tuir pra kualifikasaun daudaun ne’e atleta sira tuir hela karik ida ne’e atleta sira konfirmadu pasa ba kompete olimpiade maka CDTL husu governu prepara osan ba preparasaun iha rai laran.
Entretantu, jogu Olimpiade 2024 sei hala’o iha sidade Paris, Fransa komesa iha loron 26 fulan jullu 2024 to’o loron 11 fulan Agostu 2024, olimpiade ne’e sei realiza jogu husi modalidade 32.
Reportajen: Augusto dos Santos