Promesa Seidauk Kumpri ! Komunidade Ermera Kontinua Halerik Ba Estrada
SAPNewsTL, Ermera : Estrada ligasaun Postu Administrativu Gleno ba Postu Letefoho, Postu Atsabe no Ermera sofre erozaun no deslizamentu tanba kauza husi udan no estrada ne’ebe laiha valeta.
Iha intervista ho komunidade Julio Soares dos Reis haktuir, estrada diresaun husi Postu Gleno ba Postu Letefoh, Postu Atsabe no postu Ermera sofre erozaun barak, situasaun ne’e difikulta tebes sirkulasaun transporte sira.
“Ami senti triste ho dalan ne’ebe aat tanba estrada sofre erozaun, halo populasaun munisipiu Ermera susar atu asessu ba estada ne’ebe diak tanba ami tinan tinan sempre halerik maibe ami nia nai ulun nunka tau importansia liu ba problema ne’ebe ami hasoru”. Tenik Julio Soares dos Reis ba SAPNews iha Letefoho-Ermera,26/03/2024
Julio hatutan estrada ligasaun Postu Letefoho, Atsabe no Ermera Munisipiu Ermera aat kleur ona, estrada diresaun rua ne’e sofre rai-monu ka erozaun oioin iha fatin barak, estrada refere aat no difikulta movimentasaun transporte sira iha tempu udan tantu tempu bai-loron.
Juventude ne’e husu ba governu liliu ministériu obras públikas (MOP) atu bele solusiona estrada iha Munisipiu Ermera tanba kleur tebes ona seidauk hetan solusaun.
“Ha’u husu ba parte relevante liliu MOP hodi tau prioridade no hadia lalais estrada tanba ami presiza asessu ba estrada diak”. Nia husu
Antes ne’e, Vise Ministru Administrasaun Estatal (V-MAE) Jacinto Rigoberto haktuir nia parte sei komunika ho Ministériu Obras Públikas (MOP) hodi halo estrada refere maibe to’o ohin loron seidauk hetan resposta.
Daudaun ne’e, estrada refere iha fatin balun ameasa kotu, no estrada balun nakfilak ba tahu-been tanba kada loron sempre akontese udan, situasaun ne’e difikulta tebes sirkulasaun veíkulu sira iha munisipiu Ermera.
Hafoin, Notisia ne’e tun, SAPNewsTL seidauk halo komfirmasaun ho Ministériu Obras Públikas kona ba estrada ligasaun Gleno ba Letefoho, Atsabe no Ermera.
Jornalista : Conzita Mota