Kompanha Helfia Sei Dada Bee-Moos Ba Komunidade Uatucarbau
SAPNewsTL, DILI – Bee Timor-Leste Empreza Publika (BTL-EP), Asina kontratu ho kompanhia lokál Helfia, kona-ba implementasaun projetu fornesimentu bee-moos ba komunidade sira iha Postu Administrativu Uatucarbau, Munisípiu Viqueque.
Diretora Kompanhia Helfia, Domingas Maria Fatima Ximenes hateten, tempu badak kompanhia sei servisu maka’as hodi aselera implementasaun projetu refere tuir termu kontratu ne’ebe kompanha Helfia asina ona ho BTL-EP.
“Ha’u asina ona kontratu entre Kompanhia Helpia ho Bee Timor-Leste Empreza Publika, kompanha sei esforsa an tomak no halo serbisu ho diak tuir kontratu ne’ebe mak asina ona”,
“Nune’e kompanha sei serbisu maka’as hodi aselera serbisu tuir tempu ne’ebe mak determina ona, ami sei prepara iha tempu badak, finaliza tuir durasaun fulan sia (9) to’o tinan ida (1)”, Dehan, Diretora Kompanha Helfia, Domingas Maria Fatima Ximenes, ba Jornalista sira hafoin remata, Asina kontratu iha, Salaun BTL-EP Caicoli, Segunda (25/03/2024).
Iha oportunidade hanesan Xefi Suku Irabin de Baixo, Jose Baptista do Carmo akresenta, nia parte prontu apoia prosedu hotu tanba tempu naruk ona komunidade enfrenta problema bee moos ba nesesidade humana kada loron.
“Ha’u prontu kolabora hodi fo susesu ba projetu ne’e, tanba durante ne’e komunidade sira seidauk asesu bee moos, maibe agradese no kontenete tanba ohin kompanha konsege asina ona kontratu ho BTL-EP, atu implementa iha tempu badak”. Jose afirma
Autoridade lokal ne’e fundamenta, nia parte agradese tebes ba programa BTL-EP nian ne’ebe iha tinan 2022 hala’o visita ba nia Postu Uatucarbau liu-liu iha Suku Rin debaixo, ohin konsege asina ona kontratu.
Projetu Konstrusaun Sistema Fornesimentu Bee Moos iha Postu Administrativu Uatucarbau, munisípiu Viqueque ne’e ho orsamentu hamutuk $ 1.334,472.11.
Projetu bee moos ne’e ho sistema gravitasaun, nune’e sei kanaliza bee hosi bee matan Uabati ne’ebé lokaliza iha suku Irabi de Baixo ho nia débitu 45 lps. Projetu bee moos refere sei transforma ba sistema urbana, iha ne’ebé sei instala mos metru kontadór ba benefisiáriu sira.
Projetu kanalizasaun refere sei instala kanu transmisaun ho distánsia kilómetru 8 (8 km), portantu instalasaun liña distribuisaun ho distánsia kilómetru 11 (11 km).
Projetu ne’e sei kobre iha suku Irabin de Baixo no Uani-Uma, iha postu-administrativu Uatucarbau, ho totál populasaun 5910, nune’e mos sei instala metru kontadór unidade 985 ba uma kain 985, inklui sei fornese mos bee ba postu saúde, eskola, merkadu no igreja.
Jornalista : Eleonora Fátima dos Santos