Selebra Tinan XXIII ! Assanami : Demokratiza Setor Hotu, Povu Tenki Sai Sentru Ba Dezenvolvimentu

Imajem : Presidente PD Mariano Assanami Sabino iha Sede NasionAl Pd Kolmera, Dili, 15/06/2024. Foto : Dircia Baptista Belo

SAPNewsTL, Díli – Partidu Demokratiku (PD), selebra aniversariu ba dala-23, lider masimu Partidu Demokratiku (PD) Mariano Assanami Sabino, hateten jerasaun foun barak sei tama uma demokratiku, tan ne’e se mak hamrik iha PD tenki hatene simu ema no transmite matak malirin ba sosiedade.

Presidente PD Mariano Assanami dehan, Jerasaun foun ne’ebé namkari iha Timor laran no mos iha rai liur, iha Nasaun Inglatera, Corea no Australia sira maka lutador ne’ebé luta, hodi hatama fila fali osan hodi kontribui ekonomia rai-laran.

“Ba jerasaun foun ne’ebé namkari iha Timor laran no mos iha rai liur, hanesan iha Inglatera, Corea, Australia imi maka lutador ne’ebé luta, no imi maka lutador ne’ebé hatama fila fali osan atu kontribui ekonomia rai-laran, Partidu Demokratiku (PD) sempre sura ho imi, imi hotu ne’ebé iha rai-liur no mos iha rai-laran, estudante, joven no kiik-oan sira, imi hotu maka sei hodi nafatin Partidu Demokratiku, imi hotu mak na’in ba Partidu Demokratiku”. Dehan lider masimu Eng. Mariano Assanami Sabino, liu husi nia diskursu, iha Sede PD Kolmera.

Mariano Assanami hateten, Partidu Demokratiku laos nain ba fundador de’it, maibé ne’e ba jerasaun foun hotu ne’ebé sei mai, tanba ne’e husu, se maka hamrik iha uma ne’e tenke hatene simu ema.

“Partidu Demokratiku laos nain ba fundador de’it, maibe Partidu Demokratiku ba imi jerasaun hotu-hotu, uma ida ne’ebé ho kór azul atu fó matak malirin, atu fó oin furak, hamnasa, kontenti ba jerasaun foun ne’ebé sei mai, laos oin buis, hirus no ko’alia makás, tanba ne’e se maka hamrik ona iha uma ne’e tenke hatene simu, ema barak sei mai, sai uma nain, ema barak sei mai hodi ba oin”. Hateten Mariano Assanami Sabino.

“Partidu Demokratiku nia vizaun ho istoria ne’ebé klaru teb-tebes, istória maka mai husi transformasaun ne’ebé naruk iha nia ezistensia, Asosiasaun Social-Democrata Timorense (ASDT) ba Frente do Revolucionária do Timor-Leste Independente (Sigla Português, FRETELIN), no FRETELIN organiza movimentu oi-oin, hodi hamosu, Concelho Nacional de Revolucionário Maubere (Sigla Português, CNRM) ba fali, Concelho Nacional de Revolucionário Timorense (Sigla Português, CNRT), bainhira remata ita hari’i fali Partidu Demokratiku (PD), atu fó nafatin espiritu ba lutador sira, atu fó hanoin nafatin katal papel mehi lutador nian sei la monu, no sei kontinua nafatin Partidu Demokratiku, ne’e maka istória Partidu Demokratiku nian”. Mariano Assanami Sabino konta.

Mariano Assanami Sabino hateten, Partidu Demokratiku (PD), ba 23 anus ne’ebé nia ezistensia atu tane ukun rasik-an, tanba ukun ne’e estrutura formal, no rasik ne’e ema ida-idak nian, no liu husi eleisaun hodi entrega poder ba grupu ida, partidu ida no ema ida atu sai Prezidente Republika.

“Tanba ne’e maka ita nia tema, Partidu Demokratiku (PD) iha 23 anus ne’ebé nia ezistensia atu tane ukun rasik-an, PD ne’e rasik ukun rasik-an, ukun ne’e estrutura formal, rasik ne’e ema ida-idak nian, hanesan ohin ha’u ko’alia demos no kratia, demos katak povu no kratia/kraton katak ukun, katak ukun rasik-an an ne’e povu ida-idak nian, Liu husi eleisaun hodi entrega ba grupu ida, partidu ida no ema ida atu sai Prezidente Republika, mai husi ukun ema ida-idak nian, tan ne’e ita hotu nia partidu, povu Timor-Leste nia partidu, ne’e naran Partidu Demokratiku (PD), partidu ukun rasik-an, tanba ne’e ita kaer prinsipiu, valores ukun rasik-an nian”. Nia salienta.

Mariano Assanami Sabino akresenta, Partidu Demokratiku (PD), hakarak demokratiza setor hotu-hotu, nia vizaun klaru ona katak tenke demokratiza sosial, politika, instituisaun no infraestutura katak, buat hotu ne’ebé halo ne’e halo ba povu, sira tenke sai sentru no autor, labele halo buat ida ba grupu ka elite ida, maibé buat hotu ne’ebé halo tenke iha benefisiu ba povu.

“Partidu Demokratiku nia vizaun klaru tiha ona katak ita tenke demokratiza, sosial, politika, instituisaun no infraestutura sira, katak buat hotu-hotu ne’ebé halo ne’e ba povu, povu mak sai hanesan sentru, autor no povu tenke partisipa no povu tenke iha laran, labele halo buat ida ba grupu ka elite ida, maibé buat hotu-hotu ne’ebé halo tenke iha benefisiu ba povu no nafatin konvida sira iha laran, partisipasaun povu tenke kontinua no ba beibeik, ida ne’e maka partidu Demokratiku hakarak demokratiza setor hotu-hotu”.

“Partidu Demokratiku (PD) mai atu fó kontinua nafatin, tenke suku fila fali Timor-Leste, tanba ita iha komprimisiu de Onra liu husi juramentu, katak ita prontu atu hatutan ispiritu funu na’in sira hodi hari’i estadu de direitu no demokratiku, ita hun ida, abut ida, povu ida, rai Timor ida deit, ne’e mak ita nia komitmentu ida atu suku fila fali Timor-Leste sai ida deit, hari’i Timor foun ida ba Timor-oan hotu”. Nia hatutan.

Iha fatin hanesan, Jeneral Lere Anan Timur kongratula Partidu Demokratiku tanba hamrik ona ho forte selebra tinan ba dala 23, la’os ema baibain mak hari’i maibe mesak ema intelektual, revolusionariu no patriota mak hari’i PD, tan ne’e tenki servi povu ho domin no responsabilidade hodi kore povu husi kiak no mukit.

“Parabens ba Partidu Demokratiku, PD la’os ema baibain mak hari’i, maibe mesak ema intelektuis, revolusionariu no patriota mak hari’i tanba ne’e imi iha responsabilidade hodi servi povu no nasaun ho fuan no domin, PD nia uma lisan mak FRETILIN, nasaun nia futuru iha imi, joven sira nia liman.” Jeneral Lere Anan Timur dehan

Entretantu, seremonia aniversariu Partidu Demokratiku (PD) ba dala XXIII ne’e hetan partisipasaun husi Presidente CCI-TL Jorge Serano, Jeneral Lere Anan Timur, Padre Joel, Kuadrus, Militantes inklui estrutura nasional PN nian.

Jornalista : Dircia Baptista Belo