Arte Marsiais Uza Atributu Partisipa Missa, Pe. Augusto: Maromak Ba Ema Hotu-Hotu
![](https://sapnewstl.com/wp-content/uploads/2022/08/image-5-650x460.png)
SAPNewsTL, Lautem: Relasiona hó vizitasaun Illas São José Mahein Dioseze Baucau iha Paroquia Luro ne’ebé hetan partisipasaun maksimu husi arte marsial no ritual sira, Amo Pároco Luro, Pe. Augustu Assunção Delfim de Sá hateten: Maromak iha ba ema hotu-hotu, maromak laiha fronteira ba ema ida.
Tuir Pe. Augustu Assunção Delfim de Sá hateten sarani Luro tenke kontente moris tuir maromak nia vontade, tenke iha arependementu ba nia an no hakbesik bei-beik ba maromak nu’udár São José ita nia mahein ne’ebé hatudu ona iha nia vida.
“Ita hotu folin iha maromak futar oin, labele haree ba ita nia pasadu maibé importante rekuñese ita nia an no halo mudansa ba ita nia moris ho fiar ne’ebé los no haka’as an nafatin hodi la’o tuir São José ne’ebé maromak fihir hodi akompaña Jesus nia umanidade tanba Nia nu’udár lalenok no ezemplar ba familia hotu-hotu iha mundu”. Tenik Pe. Augustu Assunção Delfim de Sá ba Jornalista SAPNewsTL iha Luro. 29/07/2022.
![](https://sapnewstl.com/wp-content/uploads/2022/08/image-6-650x487.png)
Nia hatutan, grupo oin-oin iha nasaun Timor Leste, sira mesak sarani katólika maromak nia oan, ida ne’e labele tau fronteira ka baliza ba grupu ne’ebé eziste iha nasaun, maromak ba ema hot-hotu.
“Sira bele iha arte marsiais oin-oin, ne’e hariku no haburas identidade Timor nian, iha sira kuda ona fé fiar sarani katólika nian tanba ne’e sira nia farda hatudu arte marsiais maibé sira maromak nia oan, ne’e mak sai alvu prinsipál ba sira nia doutrina nu’udár sarani”
Enkuantu, Pe. Augustu Assunção Delfim de Sá fundamenta sira bele iha organizasaun maibé Jesus mak tenke sai a’as liu iha sira nia moris nu’udár sarani hodi kontribui ba paz, estabilidade no dezenvolvimentu nasaun nian.
![](https://sapnewstl.com/wp-content/uploads/2022/08/image-7-650x487.png)
Pe. Augustu Assunção Delfim de Sá husu ba ema hotu katak verdadeiru fé ne’ebé atu lori ema ba moris rohan laek mak fiar katólika romana tanba ne’e ema hotu presiza hakbesik an ba maromak no sai ida de’it iha maromak ida.
Jornalista: Absalão da Costa
Editor: Luis dos Santos Pailofo