São José Vizita Sarani Luro, Luis: São José Modelu Ba Familia Nazaré
SAPNewsTL, Lautem: Dioseze Baucau selebra XXV (25) anos ezisténsia , Mahein Dioseze Baucau Aman São José vizita sarani Paroquia Nossa Senhora Rainha dos Apóstolos de Luro, Luis: São José modelu ba familia nazaré
Tuir Luis Pinto, nu’udár sarani katólika ida sente kontente tebes tanba bele hetan vizita husi Aman São José Padroeiru Dioseze Baucau.
“Ami nu’udár sarani Katólika Paroquia Luro wainhira illas São José mai vizita ami sarani Paroquia Luro ami sente kontente no orgullu tanba husi ninia vizitasaun ida ne’e bele fanun ami no hamanas hikas ami nia fiar nu’udár sarani katólika”. Tenik Luis Pinto ba Jornalista SAPNewsTL iha Sentru Pastoral Cotamuto, 27/07/2022.
Nia akresenta, hahú husi 1997 to’o 1999 sira sente katak sira nia fiar nu’udár sarani katólika nafatin metin no buras maibé husi 2000 mai oin, fiar sarani komesa namlele.
“Husi 2001 to’o mai 2022 sente katak sarani nia fiar namlele tanba iha situasaun oin-oin ne’ebé atrapalla ba sarani nia fiar”. Dehan Nia.
Nia fundamenta, husi vizitasaun São José mai Sentru Pastoral Cotamuto nu’udár refleksaun ida ba familia no joven sira iha Suku ne’e.
“Tuir ha’u nia refleksaun katak hahú husi ida ne’e ami bele hatene katak iha mudansa ba fiar no hahalok familia no joven sira hodi bele la’o tuir fila fali maromak nia dalan, mudansa ne’e ita haree ba parte rua; mudansa de kualidade no kuantidade; haree ba kualidade ita labele tetu no sukat maibé haree ba kuantidade iha sarani barak mak bele aproveita no partisipa ba eventu ida ne’e”. Nia Subliña
Entretantu, nia dehan vizitasaun ida ne’e mos bele dere sarani hotu nia neon ho laran liuliu sira ne’ebé la konsege hola parte, inklui mos organizasaun Arte Marsiais sira ne’ebé partisipa direta iha vizitasaun ida ne’e.
“ Iha organizasaun oin-oin mak bele partisipa maibé nu’udár fiar sarani katólika ida ne’e mak sai hanesan doutrina ba sira hodi sira bele fila ba maromak no tau fiar nafatin iha maromak nu’udár sarani; ha’u fiar katak bele muda sira no hafoun sira nia fiar”.
Nia hatutan, São José nu’udár matadalan no modelu ba fiar sarani nian, nu’udár familia, jovens, katuas no ferik inklui ema hotu-hotu bele iha fiar ne’ebé dignu no justu tuir maromak nia hakarak.
Enkuantu, Padroeiru Dioseze Baucau Aman São José vizita Paroquia Nossa Senhora Rainha dos Apóstolos de Luro durante loron hitu no kalan hitu, kada vizita sempre hetan partispasaun maksimu husi sarani Paroquia Luro.
Jornalista: Geraldo da Gama
Editor: Luis dos Santos