Ema Barak Uza Sosmed Ba Parte Negativa, SEKOMS Kria Ona Plataforma Deteta ID Falsu
SAPNewsTL, Dili : Sekretariu Estadu Komunikasaun Sosial (SEKOMS) Mericio Juvinal dos Reis Acara saran lia hirak ne’e, wainhira halo sosializasaun literasia dijital ba estudante sira iha Eskola Sekundaria 4 de Setembru Balide, objetivu husi diseminasaun ida ne’e atu kombate hoax no promove internet saudavél iha Timor-Leste.
Sekretariu Estadu Komunikasaun Sosial (SEKOMS) Mericio Juvinal dos Reis Acara preokupa ema barak asesu informasaun ho livre maibe ema barak sei uza ba parte negativu
“Ita hakarak halo sosializasaun iha eskola ne’e para atu nune’e estudante sira bele kombate hoax no promove internet saudável iha média sósial, atu nune’e bele utiliza internet ho saudavél no kuidadu para ita hotu labele kontribui ba lia falsu iha ita nia rai”. Dehan SEKOMS Mericio Juvinal dos Reis Acara ba joranlista sira iha Eskola Sekundaria 4 Setembru Balide, Kinta-Feira,04/08/2022.
Sekretariu Estadu ne’e hatete, agora governu preokupa joven barak utiliza média sosial hodi hatun ka trata no dezakredita malu, la bandu sira uza plataforma sira maibé tenki fo hanoin ba sira uza plataforma ne’e ho matenek.
“Agora Ita nia joven sira utiliza média sosial hodi tarata ka hatun no desakredita malu mak maka’as no asesu ba pornografia mak barak liu entaun ita hanoin halo edukasaun sívika ba ita nia estudante sira tanba tuir peskiza ne’ebé mak iha ona katak joven no estudante barak mak uza média sosial barak liu hanesan Facebook, Youtube, whatsApp, Tiktok, Instagram nst; Ita mos la bandu sira uza plataforma sira ne’e maibé ita mos tenki fo hanoin ba sira uza plataforma ne’e ho matenek”. Tenik Mericio
Governante ne’e hatutan, SEKOMS sei tama sai eskola sira hotu fo edukasaun sívika ba joven no estudante sira atu bele hatene oinsa uza internet ho saudavél.
“SEKOMS sei tama sai eskola hotu hodi fo edukasaun sívika ba jovens no estudante iha rai laran hodi bele hatene klean liu kona-ba utilizasaun plataforma internet ho saudáve no SEKOMS mos husu ba joven no estudante sira uza plataforma ne’e ho di’ak tuir nia dalan hodi sai ezemplar ne’ebé di’ak ba familia, sosiedade, eskola no nasaun”. Nia salienta
Enkuantu, SEKOMS mos kria plataforma ona hodi detekta Id falsu, informasaun falsu no informasaun ne’ebé kria ho forma kriminal iha ne’ebé deit, SEKOMS mos detekta ona ema hamutuk nain 120 (atus ida ruanulu) iha Timor-Leste
Entretantu Director Sergio A. da Cruz sente kontente tebes tanba dahuluk nia estudante sira bele hetan edukasaun sívika husi SEKOMS kona-ba literasia dijital
“Ohin ba dahuluk SEKOMS ho nia ekipa marka ona prezensa iha ami nia Eskola Sekundariu Jeral 4 de Setembru hodi halo sosializasaun dijital literasia, kombate hoax no promove internet saudável, bele aumenta sira nia kuñesimentu hodi kombate lia falsu iha ita nia rai, ha’u mos apresia ba progarma ne’ebé edukativu teb-tebes husi SEKOMS “. Sergio Subliña
Enkuantu, sensibilizasaun ne’e hetan partisipasaun maksimu husi estrutura eskola nian no estudante hamutuk nain atus lima (500), Diretor ne’e mos husu SEKOMS atu kontinua formasaun ne’e ba ema hotu-hotu atu bele hatene uza medsos ho kualidade no matenek iha presente no futuru
Reportajen : Antonio Tilman & Esmeralda da Silva
Editor : Augusto dos Santos