Brígida Deklara Dezenvolve IPB Sai Instituisaun Ne’ebé Valiozu & Kualidade
Presidente IPB Brígida Antonia Coreia iha Salaun IPB Manufahi, 25/04/2025
SAPNewsTL, Manufahi : Prezidente Konsellu Jeral IPB Brigida Antonia Correia agradese ba nonu governu Konstitusional liu hosi Ministru Ensinu Superior Siensia no Kultura (MESSK) hodi hetan nomeasaun ofisial ho mandatu tinan tolu hodi lidera IPB no garante servisu ho sériu, justu hodi dezenvolve IPB sai instituisaun ne’ebé valiozu no kualidade.
Prezidente Konsellu Jeral Brigida Antonia Correia hateten, nia parte hamutuk ho membru konselho jeral Institutu Politekniku Betanu (IPB) nain rua (2) hato’o sira nia gratidaun ba Ministru Ensinu Superior, Siensia no Kultura ne’ebe fo ona konfiansa ba sira no rekomenda sira nia naran ba Konsellu Ministru IX Governu Konstituisional no resultadu final hetan nomeasaun ofisial ho mandatu tinan tolu.
“Iha biban ida ne’e ha’u lori membru Konsellu Jeral IPB nain 2 nia naran, hakarak hato’o no expresa ami nia gratidaun ba konfiansa ne’ebe Sua Exelencia Ministru Ensinu Superior, Siensia no Kultura bele lori ami nia naran, propoen iha Konsellu Ministru, no ikusmai ami nain 3 hetan nomeasaun husi Konsellu Ministru IX Governo Konstitusional ho periodu tinan 3 nia laran (2025-2028)”. Dehan Prezidente Konselho Jeral IPB Brigida Antonia Correia ba Jornalista SAPNewsTL iha salaun IPB Manufahi, (25/04/2025.
Prezidente KJ Brigida akresenta, nu’udar prezidente konsellu jeral no membru konsellu jeral iha IPB, sei hatudu prontidaun atu servisu hamutuk ho lideransa foun liu-liu Prezidente foun IPB hodi garante servisu ne’ebe sériu, justu, no ho kompromisu boot ba desenvolvimentu instituisaun nian.
“Ami mai integra ho membru Konsellu Jeral tuan ne’ebe eziste ona, iha oportunidade ida ne’e ami hakarak hato’o ba ita boot sira katak ami disponivel no hatudu ami nia prontidaun hanesan Presidente Konsellu Jeral no mos hanesan membro Konsellu Jeral iha IPB”.
“Ami sei hatudu komprimissu ne’ebe boot, seriu, honestu ho vontande ne’ebe aas tebes hodi bele servi no servisu hamutuk ho membru sira seluk liu-liu ho Presidente IPB foun, hodi bele konstroi no dezenvolve IPB ida ne’ebe valioso iha futuru mai”.
Prezidente ne’e akresenta, sira halibur hodi rona kampanha hosi kandidatu Prezidente IPB foun ne’ebe sei asume responsabilidade durante tinan haat, nia konsidera momentu ne’ebe krusial ba Instituisasun ho papel fundamental ba dezenvolvimentu agrikola, engenaria no utilizasaun teknolojia iha Timor-Leste.
Prezidente Brigida husu ba lideransa foun IPB atu garante kualidade akademika ho standar exelente, hametin parseira ho instituisaun nasional no internasional, promove dezenvolvimentu sustentável, inovasaun, no assegura jestaun transparente no efisiénsia.
“Responsabilidade Presidente IPB foun nian tenke garante akademika ne’ebe exelente, haforsa parseria institusional sira, promove dezenvolvimentu sustentavel, asegura jestaun transparente no efisiente”.
Presidente IPB Eleitu Alcino da Costa I. A Fernandes
Prezidente Eleitu IPB Alcino da Costa I. A Fernandes konsidera hamrik hodi kandidatu la’os tanba oportunidade maibe tanba hakarak asume responsabilidade.
“Ha’u mai hamrik la’os tanba ha’u mak diak liu no laos mós ha’u mak hatene liu, laos tanba oportunidade maibe tanba responsabilidade hanesan Manufahi oan ne’ebe ho laran no lolo liman hakarak tulun IPB”.
“Agradese rohan laek ba fiar tomak ne’ebe maka estrutura Konsellu Jeral IPB fó ba ha’u, hosi ita boot sira nia votus no ha’u nia konsiente katak votus hirak ne’e importante hodi kontribui ba melloramentu dezenvolvimentu IPB ho kualidade”.
Alcino afirma katak nia parte sei loke an hodi rona hanoin krítiku no konstrutivu ho ekipa ida sai espíritu ida deit.
“Ha’u sei nakloke aan hodi simu ideia konstrutivu no kritiku hotu hodi hadia diak liu IPB hodi sai Instituisasun ida ne’ebe diak no kualidade. Mai ita kaer metin liafuan save ida katak one team one spirit, ne’e katak IPB atu sai diak liu tan presiza ita hamutuk sai ekipa ida deit no tenke iha espiritu ida deit”.
Votasaun iha ronda dahuluk kandidatu Julião Pereira hetan votu 4 ekivale 33,33%, Alcino da Costa I. A Fernandes hetan votu 5 ekivale 41,67%, Pedro de Deus hetan votu 3 ekivale 25,00%, kandidatu na’in haat seluk laiha votus. Enkuantu resultadu ne’e hatudu laiha kandidatu ne’ebe manan maioria.
Nune’e, tuir estatutu Konsellu Jeral deside tama ba ronda daruak, nune’e resultadu hatudu Julião Pereira hetan derrota ho 5 votus 41,67% no Alcino da Costa I. A Fernandes hetan 7 votus 58,33%.
Jornalista : Conzita Mota & Marciana Da Conceição