Tribunal Liberta Drogadu, MUTL Fo Ultimatu Halo Manifestasaun

SAPNewsTL, Dili: Movimentu Universidade Timor Leste (MUTL), liu husi komunikadi imprensa Porta voz Luis  Gonsalves hateten kazu tráfiku droga ne’ebé públiku kestiona ne’e previstu iha dekretu lei Nú 2/2017.

“Kazu tráfiku droga ne’ebé mak agora daudaun públiku kestiona,  husi Joven nain sia (9), sira kontra lei kombate tráfiku ne’ebé previstu dekretu lei númeru 2/2017, 25 de Janeiru, iha artigu 7 sobre trafiku aktividade ilisita ne’ebé sita katak ema ruma la ho autorizasaun kuda, produs no fabrika, hasai,  prepara, oferese,  tau folin, faan, distribui sosa ka fa’an ou sosa husi ema seluk,ou lori mai, importa, halekar no ilisitu, hetan kastigu pena tinan lima to’o tinan sanulu resin lima maibé desizaun tribunal prosesa la tuir artigu hitu”. Dehan Portavóz Luis Gonsalvés iha Kampus Sentral UNTL, Kinta-Feira, 18/08/2022.

Portavóz ne’e akresenta desizaun tribunal la tuir normas jurídiku no aplika de’it medida koasaun TIR ba sira.

“MUTL halo leitura no konfirma kazu anterior trafikante  droga no konsumu katak desizaun tribunal la tuir normas jurídika  ne’ebé previstu mos iha artigu sanulu resin rua (12), dekretu lei kontra tráfiku ilisitu droga ne’ebé afirma katak bainhira ajente ho hakarak bo’ot konsege hetan substánsia ka preparadu  atu uza rasik ou husi pratika faktu balun ba temi iha artigu hitu no sei temi pena iha kazu klauzula A ho B maibé tribunal aplika de’it medida kuasaun TIR ba konsumidor tanba ne’e ami husi Movimentu Universitáriu Timor Leste hakarak ezizi”. Tenik nia

Nia hatutan,  MUTL husu ba Parlamentu Nasional atu halo rezolusaun hodi hamate  droga iha Timor Leste.

“Husu ba PCIC  atu nafatin rekolla dadus sira nune’e bele kombate droga, husu ba Parlamentu Nasional atu halo rezolusaun hodi hamate droga no husu ba Prezidente  Repúblika halo deklarasaun funu hasoru droga iha Timor Leste”. nia sublinha   

Entretantu, bainhira la hetan resposta pozitiva, maka Movimentu Universitariu Timor Leste sei organiza povu tomak hodi halo manifestasaun hasoru Tribunal Rekursu.

Iha fatin hanesan Portavóz Cristalino Amaral fundamenta MUTL hamrik hodi fo sai ba públiku katak ida ne’e krime no tribunal tenke klarifika ba públiku.

“Tuir ami nia observasaun katak problema ne’e iha tribunal tanba  iha tribunal rasik liberta tiha autor balu konsumu droga,  ho ida ne’e husi  MUTL rasik hamrik hodi hateten ba publiku katak ida ne’e krime, bainhira tribunal hateten sira ne’e vitima, mak tribunal tenke klarifika  autor lolos ne’e mak  se, ida ne’e ita hotu nia hakarak”. nia fundamenta

Entretantu,  nia  salienta sei halo manifestasaun hasoru wainhira sira la buka tuir hotu ema ne’ebé lori droga mai Timor.

“Husu ba PCIC atu buka tuir droga ne’ebé mak ema hodi mai Timor no karik la buka ami sei kontinua no mobiliza  povu tomak hodi hamri’ik halo manifestasaun kontra hahalok injustisa  ida ne’e tanba ne’e ami hakarak ko’alia tan de’it katak tribunal mak fo loron sanulu resin lima(15) maibe MUTL fo loron Tolu (3). Nia hakotu

Jornalista:  Aquelina Magalhães

Editor: Ekipa Editorial