AHMDTL Konsidera Desizaun TDD Inkapasidade No Hamonu Integridade Juridisiál

SAPNewsTL, Dili: Relasiona ho Tribunal Distrital Dili (TDD) ne’ebé mak fo medida koasaun Termu Identidade Rezidénsia (TIR ) ba arguidu sira ne’ebé halo krime tráfiku no konsumu ilísitu droga, Asosiasaun Halibur Defisiénsia Matan Timor Leste (AHDMTL) la satisfas ho desizaun  Ministeiru Públiku ne’ebé aplika medida TIR ba arguidu nain sia

“Droga hanesan problema sosial ida ne’ebé sériu teb-tebes, fo ameasa ba sosiedade nia moris hanesan seguransa ho liberdade integridade fisika, no dignidade umana, ami hanesan organigasaun ba ema ho difisiensia ami la satisfas ho desizaun husi Ministru Públiku ne’ebé aplika medida koasaun TIR ba arguidu nain 9, artigu 7 ne’ebé mak ko’alia kona-ba tráfiku no aktividade ilisita ne’ebé tuir lolos ho nia kastigu prizaun tinan 5 to’o 15”. Dehan Portavóz Carceres Nunes Arca ba jornalista sira iha edifisiu AHDMTL, Sexta-Feira 19/08/2022.

Porta vóz ne’e rekomenda ba parte relevantes sira atu servisu ho justu, transparensia no profisional atu labele haburas injustisa iha nasaun ida ne’e.

“Ami rekomenda ba instituisaun relevante sira liuliu ejiji ba Ministeriu Públiku ne’ebé mak nain ba desizaun atu halo revisaun ba arguidu nain 9 ne’e ho justu atu  la bele haburas fali injustisa iha nasaun no husu ba alfandega atu servisu ho efetivu, justu, transparansia no hatudu profisionalismu  no mos rekomenda ba Unidade Polisia Fronteira (UPF) atu halo kontrolu ka patroliamentu rutina no efetivu hodi evita sasan ilegal tama iha teritoriu”. Tenik nia

Iha fatin hanesan Direktor AHDMTL Gabriel Ponsiano de Sousa fundamenta desizaun tribunal ba arguidu nain sia hamonu integridade orgaun juridisiáriu.

“Desizaun ne’ebé mak Tribunal Distrital Dili aloka, atu hamonu integridade orgaun juridisiáriu nian tanba ita hatene públiku atu fiar juiz sira nia desizaun mai husi sira nia asaun rasik sira nia asaun ne’e prova katak inkapasidade atu aplika pena todan ba ita nia arguidu nain sia”. Direktor ne’e Salienta

Direktor ne’e aumenta asaun ne’ebé juridisiáriu halo ne’e, konsidera laiha kapasidade atu julga nain ulun sira nia oan no  lei ne’e sira aplika de’it ba povu ai-leba nia oan sira.

“Ita nia lei espesifiku N°2/2017 lei pena todan tinan 5 to’o 15 lei ne’e aplika de’it ba ita nia povu ai-leba nia oan sira, tuir informasaun arguidu nain 9 ne’e mesak familia lider nasional de’it, asaun ne’ebé mak ita nia juridisiáriu sira halo ne’e, sira mak prova sira nia kapasidade katak la iha kapasidade atu julga na’i ulun sira nia oan sira tanba ita haree arguidu nain 9 ne’e horseik kaptura ona katak hamutuk 11 ida sira ne’e balun komete dala 1 no dala 2 ona lolos sira fo pena ne’ebé todan no kuandu sira vítima ita nia maluk artista Juga Gama mos sai vítima maibé kastigu nia to’o mate iha prizaun”. Nia realsa

Nia hatutan, hanesan juventude ho defisiénsia lamenta ho asaun Ministeriu Públiku no Tribunal Distrital Dili ba arguidu

“Ita nia justisa dadaun ne’e pratika injustisa tanba ne’e mak ami hanesan juventude ho defisiensia la menta ho asaun sira ne’e, akujasaun ne’ebé mak Ministru Públiku hamutuk ho Tribunal Distrital ne’ebé mak aplika ba ita nia arguidu nain 9, ami husu ba Ministeiru Publiku tenke halo rekursu tanba kazu ida ne’e hatudu katak kazu emerjensia ita husu para la bele to’o tinan oin ita husu atu akujasaun urjentemente ida ne’e mak ita nia hakarak”. Nia subliña

Gabriel akresenta karik Ministeriu Públiku la halo rekursu nu’udár sosiedade sivil sei nafatin ezije hamutuk ho organizasaun juventude sira

“Sosiedade Sivil nafatin defende ba buat ne’ebe mak lo’os karik Ministru Públiku la halo rekursu ami nafatin ezije, hamutuk ho organigasaun juventude nafatin exize atu bele pratika ba buat ne’ebe justu, honestidade, transferensia iha ita nia nasaun Timor Leste”. nia sublinha

Enkuantu, Asosiasaun Halibur Defisiénsia Matan Timor Leste (AHDMTL) apela ba joven sira atu labele konsumu droga ne’ebé mak ameasa ema nia vida no nasaun nia futuru.

Jornalista: Aquelina Magalhães & Marcela Merry da Silva

Editor: Ekipa Editorial