MEJD no UN Women Asina Akordu Hapara Violénsia Iha TL
SAPNewsTL, Dili: Ministeriu Edukasaun Juventude no Desportu (MEJD) liu husi Direktor Jeral MEJD asina akordu no halo parseria ho United Nation Women, Objetivu husi Akordu ne’e atu haree ba programa igualidade jéneru no violensia jéneru ba feto no labarik feto hodi empodera komunidade iha eskola ba hapara violensia bazeia ba jéneru iha Timor-Leste.
“Objetivu husi asina akordu ne’e atu bele haree ba iha programa igualidade de jeneru no mos prevensaun violensia jeneru ba labarik feto sira hodi suporta implemetasaun ne’ebé efektivu ba programa ekstra-kurrikular halo ligasaun ho respeitu no sesaun pozitivu ho inan aman ba iha eskola 45 iha munisipiu 7 hanesan Ermera, Bobonaru,Viqueque, Covalima, Baucau,Dili no Oe-cusse hanesan parte ida husi aproximisaun eskola nian ba prevene violensia bazeia ba jéneru”. Dehan Direktor Jeral MEJD António Pires iha Novo Turismo, Kuarta-Feira, 24/08/2022.
Direktor Jeral ne’e akresenta tan katak kontinua halo parseira no akordu ne’e atu empodera komunidade eskola sira no prevene ba diskriminasaun jéneru no violensia kontra feto no labarik feto.
“Programa ne’e la’o ona soke memorandu klandestina ne’e mak uluk ninian hotu ona mak ita halo foun fali no extende tan, kontinusaun parseira ne’e hanesan kolaborasaun ida atu empodera manorin sira, komunidade sira no eskola sira, liu husi utiliza instrumentu kurrikulu halo ligasaun ho respeitu ne’ebé dezenvolve husi UN Girls education initiative atu prevene hatan no responde efektivamente ba diskriminasun jéneru no violensia hasoru feto no labarik feto sira”. Tenik Diretor Jeral
iha fatin hanesan Xefe UN Women Timor Leste Amy Nishtha Satyam hateten UN Women hakarak servisu hamutuk MEJD hodi haree ba violensia hasoru feto no labarik feto.
“iha tinan 2020 UN Women asina ona memorandu ho Ministriu Edukasaun maibé agora hakarak haforsa tan hodi servisu hamutuk ho Ministeriu Edukasaun atu asegura liliu hare ba labarik feto no mane sira atu hapara violensia hasoru feto no labarik feto iha ambiente eskola”. Nia informa
Xefe UN Women ne’e fundamenta programa ne’e importante no kritiku tebes no presiza halo mudansa atu muda labarik sira ne’ebé idade sei kiik.
“Ida ne’e importante tebes tanba servisu ba labarik ne’e kritiku tebes, labarik sira mak rekursu bo’ot tebes no importante atu muda ema nia hanoin wainhira nia sei idade kiik no sei halo mudansa ba iha eskola no sai ba komunidade tanba wainhira ita halo mudansa ba ema ne’ebé idade bo’ot kadaves sei kleur no lahanesan ho labarik kiik sira”. nia afirma
Enkuantu, UN Women sei servisu hamutuk ho Fundasaun Alola hodi sei haree liu tan ba enkuadrasaun sosiedade sivil nian atu halo monitorizasaun ba feto no labarik sira iha sosiedade nia leet
Jornalista: Antonina Lopes da Silva & Maria de Jesus Dacimau
Editor: Luis dos Santos