Loke Sesaun Solene, PR Horta Agradese Ba Povu Nia Konfiansa
![](https://sapnewstl.com/wp-content/uploads/2022/09/90-edited.jpg)
SAPNewsTL,Dili: Prezidente Repúblika Jose Manuel Ramos Horta halo abertura ba sesaun solene Quinta Legislativa, iha Uma Fukun Parlamento Nasional ne’ebé lidera husi Prezidente Parlamentu Nacional, iha diskursu Xefe Estadu hakruk no agradese ba povu ne’ebe fo fiar ba nia hodi tur iha pozisaun ne’ebé a’as iha rai ida ne’e.
“Ha’u hamrik iha ne’e, ha’u hakruuk no haraik an ba povo ne’ebé ho sira nia votu Soberanu fo fiar mai ha’u atu tur iha pozisaun a’as iha rai ida ne’e atu servi sira, atu sai sira nia lian ba sira nia espetativa, sira nia ta’uk sira, sira nia deskontentamentu sira no mos sira nia esperansa”. Dehan Prezidente Repúblika iha nia diskursu iha uma fukun Parlamentu Nasional, Kinta-Feira, 15/09/2022.
Prezidente ne’e mos hakruk ba as’wain sira ne’ebé mate ona no sira ne’ebé sei moris ne’ebé nia dala barak hasoru ona iha rai ida ne’e.
“Ha’u hakruk ho umildade ba ita nia martir no As’wain sira, ne’ebé mate tiha ona no sira ne’ebe sei hamutuk ho ita no grasa Maromak nian, Maun boot Xanana hamutuk los tebes ho ita, ha’u hakruk ho reverensia ba maluk barak ne’ebe kontinua sai deskonesidu, eroi moris sira ne’ebé haraik aan, ne’ebe ha’u dalabarak, hasoru tiha ona iha Rai lulik ida ne’e”.Nia hatete
Entretantu, Xefe Estadu ne’e mos hakruk no agradese ba funsionario barak ne’ebé kontinua apoiu liu husi esforsu atu servisu hamutuk durante loron atus ida ba mandatu daruak nian.
“Ha’u nia presidensia ne’e nu’udar presidensia ne’ebe nakloke, la ho portaun besi no laiha seguransa armada Prezidensia ne’e asesivel ba ema hotu, partikularmente ba labarik sira ne’ebé laiha asesu restritu ba resintu sira prezidensial nian”. Tenik PR
![](https://sapnewstl.com/wp-content/uploads/2022/09/91-650x445.jpg)
Enkuantu Prezidente RDTL ne’e mos agradese ba Parlamentu Nasional ne’ebé ho sira nia asaun matenek hodi pasa rezolusaun unanima kona-ba Fraternidade umana.
“Ita nia uma kreda ne’ebé respeitadu hatete katak adopsaun ba rezolusaun ida ne’e koresponde ba vokasaun espesial no misaun povu Timor Leste nian iha mundu,deklarasun Fraternidade umana ne’ebé hakerek hamutuk no lansa iha 2019 husi Papa Francisco no Iman Bo’ot Ahmad Muhammad Al Tayyeb, buka atu promove liu tan “kultura Respeito mutua” ida entre relijaun sira no komunidade sira iha mundu tomak”. Nia hakotu
Jornalista: Vinsensius Morais
Editor: Luis Pailofo