EhD Rihun Ida Resin Asesu Universidade, MESSK Apoiu Ekipamentu 136
Imajen intrevista Direktor Ezekutivu Asosiasun Defisiensia Timor Leste Cesário da Silva iha salaun ADTL Maskarinhas, Dili, Sexta-Feira, 30/ 09/2022
SAPNewsTL, Dili: Assosisaun Defisiensia Timor Leste (ADTL) hetan apoiu ekipamentus atus ida tolu nulu resin neen (136) husi Ministru Ensinu Superior Siénsia no Kultura (MESSK) hodi suporta estudante universitariu defisiensia hamutuk haat nulu resin tolu (43)
“Objektivu husi aktividade ida ne’e ajuda material ba estudante defisiensia sira hodi tulun sira atu sira mos bele hatene no komprende hanesan estudante sira ne’ebé mak la ho defisiensia, ami nia akompañamentu durante ne’e maluk defisiensia sira hasoru dezafiu oin-oin no menus liu fasilidade”. Dehan Direktor Ezekutivu Asosiasun Defisiensia Timor Leste Cesário da Silva ba jornalista iha salaun ADTL Maskarinhas, Dili, Sexta-Feira, 30/ 09/2022.
Direktor Ezekutivu ne’e akresenta, sira halo esforsu ida hamutuk ho ensinu superior hodi hetan tulun balun hodi suporta estudante defisiensia sira ne’ebé sei iha prosesu nia laran.
“Ami foin hahú ho estudante hamutuk haat nulu resin tolu (43), estudante sira seluk sei iha hela prosesu nia laran no sei hatan tan ba sira ne’ebé seidauk”. Tenik Direktor.
Cesário hatutan, total estudante defisiensia ne’ebé mak hala’o sira nia estudu iha universitariu hamutuk rihun ida resin.
“Universitáriu hamutuk rihun ida resin mak agora daudaun ne’e hala’o sira nia estudu no sira ne’ebe mak agora daudaun hetan ekipamentus ne’e hamutuk haat nulu resin tolu mak hetan ekipamentus ne’ebe ajuda husi Ministro Ensinu Superior, kompostu husi mane 23 no feto 20”. Nia informa
Entretantu, Direktor ne’e realsa, ekipamentu sira ne’ebé mak apoiu ba estudante sira mak hanesan laptop, headsed , tap rekord, karatas brille, riglet no projector, total ekipamentu sira ne’ebé mak ajuda ba estudante defisiensia sira hamutuk 136 , laptop 43, heansed 15, tep rekord 15, kartas brille 50, riglet 12, projetor 1 no ekipamentus sira mak bele suporta sira para atu hodi akapta iha aula aprendijazem.
Iha fatin hanesan, estudante defisiensia UNTL João Martins da Silva sente kontente ho ekipamentu ne’ebé apoiu husi MESSK ba ADTL hodi fasilita sira nia aprendijazen.
“Ami sente kontente tebes, ADTL ho Minsitru Ensinu Superior bele suporta ekipamentus mai ami ne’ebé mak ho defesiensia ho nune’e mais fasil liu ba ami hodi aprende iha prosesu aprendijazen ida ne’e, nune’e bele hatene no komprende wainhira dosente sira fo materia no aprezenta materia mai ami”. João salienta
Enkuantu, estudante defisiensia ne’e mos husu ba Ministru Edukasaun no Ministru Ensinu Superior sira nafatin suporta ekipamentus ba defsiensia sira labele para de’it iha ne’e, kontinua apoia no fasilita maluk defisiensia sira ne’ebe mak iha área rural sira.
Jornalista: Antonio Tilman & Aquilina Taec
Editor: Luis dos Santos