Nilton Rezigna Husi Prezidente, Asembleia Nomeia Hikas Germano Lidera LFTL

SAPNewsTL, Dili: Hafoin Prezidente LFTL Nilton Gusmão halo karta rezignasaun hodi retira husi LFTL, Prezidente Assembleia Jeral hamutuk ho Membru Ezekutivu Liga Futebol Timor Leste (LFTL) halo ona reuniaun no Germano da Silva sai Prezidente Interino  tuir estatutu LFTL nian

“Bainhira ami simu karta rezignasaun husi prezidente LFTL Nilton Gusmão, asembleia jerál LFTL organiza kedas reuniaun no ikus liu mak reuniaun ho komponente tomak órgaun LFTL nian hodi rona opiniaun molok meza asembleia jerál foti desizaun bazeia bá estatutu LFTL nian, ami nomeia ona vise  prezidente  dahuluk Germano da Silva hodi asume fali prezidente interinu hodi troka Nilton Gusmão ne’ebe rezigna an ona  ba  trimestre ida to’o kongresu estraordináriu tuir estatutu”. Dehan nia ba jornalista sira iha Estadium Munisipal Dili, Kinta-Feira, 29/09/2022.

Prezidente Assembleia ne’e akresenta, iha estatutu LFTL rasik  katak  bainhira prezidente LFTL husu rezignasaun  vise prezidente dahuluk  mak sei substitui hodi lidera LFTL ba periodu trimestre  hein asembleia anual ka kongresu extraordinariu  hodi hili prezidente  foun.

“Iha ami nia estatutu rasik hatete bainhira prezidente LFTL husu rezignasaun vise prezidente dahuluk mak substitui hodi lidera LFTL ba periodu trimestre, hein asembleia anual ka kongresu extraordinariu hodi hili prezidente foun”. Tenik Prezidente Asembleia

Manetelu hatutan, reuniaun asembleia jerál ne’ebé  hala’o ona no rona  opiniaun sira ne’ebé iha liu-liu komisaun juridisaun hanoin ba resposta bá rezignasaun hosi prezidente LFTL mak tenke la’o tuir estatutu LFTL nian.

Entretantu Prezidente ne’e informa,  bá oin komisaun juridisaun sei halo paresér ba jurídika nu’udár  baze legal ida ba meza asembleia Jerál LFTL nian hodi  delega kompeténsia bá  vise-prezidente dahuluk  Germano da Silva hodi assume kargu prezidente interinu ne’ebe   karta kompeténsia bá primeiru vise-prezidente hanesan prezidente interinu maka foin bele loke diskusaun ho Federasaun Futeból Timor Leste (FFTL) no bele mos ho governu ko’alia fali planu ba liga nian.

Jornalista:  Augusto dos Santos