Preokupa Futuru TL, Assanami : Espíritu Maubere-Kamarada Tenki Trava Dezigualdade

SAPNewsTL, Dili : Hafoin Partisipa iha semináriu ne’ebe organiza husi Movimento Rezistensia Sosial(MRS) no Klibur Estudante Progresivu (KEP) ne’ebe lori ho Tema ‘Futuro Timor-Leste’, Iha Palestra Orador Mariano Assanami Sabino hateten Futuro Timor Leste ne’e, futuru ida ne’ebe tenki buras ho Dezenvolvimentu ne’ebe dignifika sosiedade, igualidade ba ema hotu-hotu, labele iha diskriminasaun ne’ebe haree deit ba grupu ka partidu

Tuir Mariano Assanami Sabino katak libertasaun nasional ne’ebe iha libertasaun pártia Timor oan barak hetan sofrementu no diskriminativu, iha ne’ebe Timor oan sira hetan prega ho liafuan maubere no kamarada

“Ita ne’e diskrimanativu, liafuan maubere ne’e rasik ita foti husi liafuan ida ne’ebe ema lakoi temi Timor oan ne’ebe mak servisu iha kintal laran, nia servisu iha nia to’os, kuda kafé, maibe na’in ba kafé ne’e ema seluk, ema ne’e lakoi temi joão ka mauleki ka metamali ga, naran jentiu sira lakoi temi sira bolu maubere deit, katak Hanesan deit, liafuan maubere transforma ba estigma ida ne’ebe forte, teza ida ne’ebe ke forte duni para atu kontra duni dezigualdade ne’ebe mak akontese iha tempu kolonializmu”. Tenik Assanami iha Sede MRS Villa-Verde, Dili, 30/09/2022

Assanami hatutan liafuan kamarada nu’udar ispiritu ida kontra okupasaun, kontra explorasaun naruk ne’ebe hakiak liurai oan sira hodi fo benefisiu ba kolonialista sira

“Liafuan Kamarada foti husi ita nia kontra ba okupasaun ne’ebe mak halo explorasaun naruk, explorasaun ne’ebe mak fahe ita, hakiak liurai oan kiik oan sira, depois halo explorasaun, ita ho ita halo explorasaun, maibe se mak hetan benifisiu ne’e kolonialista sira, entaun liafuan sira kamarada katak ita hanesan, ita mesak maun alin, ita mesak hanesan, liafuan companheiru rasik mos hatudu igualdade, Labele haluhan katak, luta nia konteudu prinsipal maka igualdade”. Dehan Assanami

Deputadu ne’e akresenta, Futuro Timor Leste ne’e, futuru ida ne’ebe maka sei buras ho Dezenvolvimentu ne’ebe tenki dignifika sosiedade, igualidade ba ema hotu-hotu, labele iha diskriminasaun ne’ebe haree deit ba grupu ka partidu

“Ita tenki iha futuru Timor Leste ne’ebe bele dignifika ema hotu, igualidade ba sosiedade hot-hotu, ema hotu tenki sente katak nia nu’udar na’in ba  rai ida ne’e, to’o ohin loron ita nia haree katak, partidu sira kuandu ba ukun ho karakter grupuista, hadau tiha estadu ne’e ba partidu nian, depois hamosu diskriminasaun barak, ema barak laos partidu seluk tenki hasai tiha, ou ema balun ne’ebe lakoi partidu, nia profisional Labele tanba laos partidu, ida ne’e ita monu fila fali ba karakter ida diskriminasaun ne’ebe maka uluk ema explora ita”. Hatete Assanami Sabino

Enkuantu, Deputadu Mariano Assanami Sabino haklaken Joventude tenki sai nain lolos ba rai ida ne’e, Juventude tenki hetan servisu iha Timor Leste, servisu ne’ebe dignu no kontroladu ne’ebe la’os deit haree ba kuantidade maibe tenki iha kualidade no progresivu

“Ita hatene katak politika haruka Timor oan ba rai-liur, ita tenki kontrola ho didiak para sira ba servisu ho dignu, Timor Leste tenki sai kampu de servisu ba sira, labele husik deit hanesan ne’e, imi iha energia, mudansa iha imi nia liman, imi nafatin esforsu, disiplina, badinas, nafatin iha esperansa bo’ot katak rai ne’e sei muda, rai ne’e jerasaun foun nian”. Dehan Assanami iha nia palestra

Enkuantu, Semináriu ne’e hetan partisipasaun maksimu husi elementu Movimento Rezistensia Sosial(MRS) no Klibur Estudante Progresivu (KEP), estudante Universitariu sira inklui Estudante sekundaria sira

Journalista :  Conzita Mota

Editor          : Luis Pailofo