Selebra Loron Nasional Juventude, AAE-FMCS UNTL Realiza Medisina Cup Ba Dala VII

SAPNewsTL, Dili: Assosisaun Akademika Estudantil Fakuldade Medicina e Ciência de Saúde (AAE- FMCS) realiza Medisina CUP ba dala 7 hodi komemora loron nasional Juventude ba dala XVII no Masakre  Santa kruz 12 de Novembro ba Dala XXXI  tinan 2022.

Iha diskursu Prezidente Komisaun Organizadora  José Mario de Jesus Soares hateten aktividade ne’e sai hanesan Kultura iha Medicina nian, programa anual ne’ebé sempre realiza kada tinan iha ambitu hodi komemora loron Juventude ba dala sanulu resin hitu (17) no Masakre Santa Kruz ba dala tolunulu resin ida (31) ne’ebe monu iha loron 12 de Novembru 1991 no agora ba 2022 hodi lembra hikas heroi as’wain sira nia luta ba rai ida ne’e. “Lembra no banati tuir loriku as’wain ne’ebe dedika sira nia an, lakon sira nia vida,  fakar ruin no raan hodi sosa ita nia liberdade, nune’e ohin loron  ita bele goza hamutuk nasaun nia desenvolvimentu”. Dehan Prezidente Komisaun Organizadora  José Mario de Jesus Soares ba jornalista sira iha  Kampu SEJD, Sábadu,01/10/2022.

Prezidente Komisaun ne’e akresenta nu’udar jerasaun kontinuador  tenki kontinua erois sira nia mehi  hodi luta, kontribui ba paz no dezenvolvimentu nasional iha rai doben ida ne’e liu husi kapasidade no talentu ida-idak iha area desportu.

“Hanesan estudante ne’ebe hala’o estudu iha area saúde, ita la’os estuda de’it maibe oinsa ita bele aprende no dezenvolve an iha area sira seluk hanesan desportu hodi sai hanesan estudante ne’ebe ativu ho fiziku saudavél, matenek no liman badaen”. Tenik Prezidente Komisaun

José hatutan, ekipa ne’ebe rejistu iha  Cup  AAE- FMCS  nian ba dala hitu ne’e hamutuk ualu nulu resi haat (84) ba iha modalidade futeball,  basqueteball no voleiball ne’ebé tuir kriteria ba rijistrasun kada ekipa ida ho montante 13 dolares,  10 dolares ba taxa no 3 dolares ba ekipa apoiu servisu.

 Prezidente ne’e salienta, orsamentu ne’ebe komisaun hetan ne’e ho total dois mil duzentos setenta e dois dolares (2,272) ne’e mai husi rejistasaun no mos husi Kompanhia Timor Telekom

Iha fatin hanesan, Senadora Fakuldade Medicina e Ciência de Saúde  Irene Colai M. da Costa katak atividade ida ne’e realiza ho objektivu atu kesi lasu amizade entre estudante sira iha Fakuldade Medisina.

“La’os atu hatete hodi manan taxa ne’ebe bo’ot  maibé atu kesi metin domin, paz no estabilidade hodi hametin ligasaun di’ak liu tan no lasu amizade entre FMCS nia ema kompostu husi departamentu haat (4) no kursu tolu (3) oinsa atu kuinese malu di’ak liu tan nu’udar familia ida iha futuru saude nian hodi kontribui ba vida saudavel”. Nia informa

Senadora ne’e fundamenta, ativiadade Medicina Cup ne’e hanesan aktividade ne’ebé mak realiza ba dala hitu, siknifika halo ona iha tinan hitu nia laran no atividade ne’ebe sempre suporta husi Fakuldade, Dekanu, Vise Dekanu UNTL nian ba iha asuntu estudantil nian.

Enkuantu, atividade desportivu ida ne’e sei la’o durante fulan ida iha kampu Sekretariu Estadu Juventude no Desportu Lesidere Dili

Jornalista: Antonio Tilman

Editor: Luis dos Santos