Kazu Ró Haksolok ! Governu Sei Haruka Ba PGR Halo Investigasaun & Prosesu Legal
Imajem : Ro Haksolok
SAPNewsTL, Díli : Polémika Ró Haksolok ne’ebe seidauk iha solusaun, Primeiru Ministru Kay Rala Xanana Gusmão deklara governu sei haruka ba Procuradoria-Geral da República hodi halo investigasaun no prosesu legal.
“Ró Haksolok, governu sei haruka ba Procuradoria-Geral da República atu hahú ona investigasaun no prosesu legal”. Deklara Primeiru Ministru Kay Rala Xanana Gusmão iha Palásiu Presidensial Aitarak-Laran, 19/03/2026.
Konsellu Ministrus hala’o sorumutu halo analiza konkluzaun ba auditoria forense ne’ebé hala’o husi EY Portugal kona-ba prosesu akizisaun no jestaun aviaun Twin Otter no mós konstrusaun ró Haksolok, ne’ebé hala’o husi Autoridade Rejiaun Administrativa Espesiál Oekusi Ambenu.
EY Portugal halo parte iha rede internasionál Ernst & Young, organizasaun servisu profisionál ida ne’ebé boot liu iha mundu, ho esperiénsia hodi hala’o auditoria ba entidade públika no privada sira.
Durante sorumutu, aprezenta deskrisaun ida kona-ba prosesu akizisaun, jestaun no konstrusaun ba ekipamentu sira ne’ebé temi ona, no mós konkluzaun prinsipál sira hosi auditoria forense.
Estaleiru Ro Haksolok ne’e kontrata iha loron 22 Setembru 2014 hosi Governu dalima no lansa iha loron 26 fulan Maiu 2017, maibe infelizmente konstrusaun paradu no to’o agora seidauk finaliza konstrusaun ba estaleiru refere iha Figueira de Fox, Portugal.
Tuir budget ne’ebe SAPNews asesu katak estadu Timor-Leste gasta ona orsamentu hamutuk millaun 34 dolares amerikanu ba Rô Haksolok, maske nune’e to’o oras ne’e seidauk iha serteza kona ba finalizasaun.
