SAP News Presta Omenagem Ba Saudozu Otélio! Clementino : Nia Bele Mate Maibe Nia Obra La Mate
Imajem: Ezekutivu no jornalista Média Sapnews.com presta omenajem ikus ba Jornalista Antigu, Otélio Ote iha Fomento, 29/04/2026.
SAPNewsTL, Dili : Ezekutivu no jornalista Média Sapnews.com presta omenajem ikus ba Jornalista Antigu, Otélio Ote ne’ebe husik ona mundu tanba sofre moras struck.
Presidente SAPNews Clementino Bragança Machado sente triste tanba lakon pessoa importante no figura antigu jornalista iha mundu jornalismu Timor-Leste nian.
“Falesimentu Jornalista Senior Otélio Ote la’os deit família mak lakon, maibe komunidade média no SAPNews mós sente lakon no triste tanba ema diak ida ne’ebe sempre fo nia kontribuisaun boot iha mundu jornalismu ne’e lakon sedu iha ita-nia let”. Hateten Presidente SAPNews Clementino Bragança iha Fomento, 29/04/2026.
Bragança Machado mós hato’o sentidu kondolénsia profunda ba família Otélio Ote ne’ebe hasoru situasaun difisil ida ne’e, espera maktoban bele hetan fatin diak iha lalehan no sai harohan na’in ba komunidade média iha Timor-Leste.
“Ami hato’o sentidu profunda kondolénsia ba família matebian no ema hotu ne’ebe sente lakon ho Otélio Ote nia mate, ita hamutuk iha orasaun no koragem hodi hein katak nia bele hetan fatin diak iha lalehan no sai harohan na’in mai ita hotu ne’ebe sei moris iha mundu ne’e”. Nia sublinha
Bragança hatutan, Otélio ema ida ne’ebe fo ninia an tomak ba imprensa hari’i média, sai inspirador ba jornalista foinsa’e sira no apoia ba existênsia SAPNews
“SAPNews kunhese nia diak, nia ema ida ne’ebe apoia média lubun ida ho ninia kunhesimentu no kapabilidade tomak, nia mós apoia makaas tebes wainhira ami joven sira hari’i SAPNews iha tempu difisil, nia mak autor ida ne’ebe fo apoia no SAPNews sai registradu ka hetan legalidade iha nia liderança, ami la haluha nia, ami aprende buat barak husi nia”.
“Otélio Ote mak mate maibe ninia Hanoun, ideia, vizaun no obra sira la mate, ami joven sira sei kontinua hatutan ba oin, nia sempre dehan ema ne’ebe aprende beibeik sei sai forte no profesional liutan duke ida ne’ebe dehan hatene ona maibe lakohi aprende tan no la aktualiza an”. Nia konta
𝐎𝐭𝐞𝐥𝐢𝐨 𝐎𝐭𝐞 koñesidu ho naran Ote, moris iha área Nonkikan, Rejiaun Espesiál Oe-cusse, iha loron 31 fulan Dezembru tinan 1969. Akaba nia eskola primária iha SDN Oe-Silo, Oe-cusse iha tinan 1981, kuntinua Pre-sekundária iha SMPN Pante-Makasar Oe-cusse to’o tinan 1980.
Iha nível Sekundária, Otelio Ote, eskola durante tinan tolu iha Eskola Sekundária Públiku Díli (SMAN 1 Dili) no remata iha tinan 1987 no akaba ninia kursu iha ensinu superiór Universidade Timor-Timur – UNTIM, iha tinan 1992.
Otelio Ote hahú ninia kna’ar iha mundu journalízmu liu iha jornál semanál Suara Timor-Timur (STT) iha tinan 1988-1999, liu tiha tinan ida loloos iha tinan 1989 to’o tinan 1992 nia asume kna’ar nu’udar jornalista iha Revista Caritas Universidade Timor-Timur (UNTIM).
Iha Tinan 1992 -1999 Otelio Ote mós servisu iha Diáriu Suara Timor Timur (STT), Diáriu Media Indonézia. Hafoin kuntinua servisu nu’udar jornalista iha Televizaun RCTI-SCTV iha tinan 1993 to’o 1994. Iha tinan 1993 to’o 1999 asume mós kna’ar jornalista iha Televizaun RCTI. Hafoin sai nu’udar kontributór ba Assosiated Press (AP) TV 1998 to’o 1999. Iha tinan 1999, Ote mós asume kna’ar nu’udar kontributór ba TV NHK husi Japaun.
Hafoin Timor-Leste independénsia, iha tinan 2000 ate 2004, Otelio Ote, hala’o kna’ar nu’udar Jornalista / Editór / Wakil Pemred iha Diáriu Timor Post nomós asume kna’ar nu’udar koordenadór ba Sentru Treinamentu Jornalizmu Diáriu Timor Post.
Iha tinan 2002-2009, Ote asume kargu nu’udar editór iha jornál Lifaun Post, Tabloid TQ. Tabloid Bola. Enkuantu iha tinan 2004 to’o tinan 2009, Otelio Ote, asume kna’ar hanesan Xefe Redasaun iha Revista Lafaek no Jornál Labarik. Hafoin iha tinan 2011 to’o 2013 asume kna’ar hanesan Diretór no Xefe Redasaun iha Diariu Timor Post no editór iha online www.artistimor.com.
Iha mundu organizasaun journalízmu, Prezidente Conselho de Imprensa ne’e asume mós kna’ar nu’udar Koordenadór Asosiasaun Jornalista Timor-Leste, iha tinan 1999-2001. Tinan 2001 – 2010 asume kna’ar Prezidente Sindikatu Jornalista Timor-Leste.
Otelio Ote hetan konfiansa hodi asume pasta nu’udar Koordenadór Komisaun Lejislasaun Komunikasaun Sosiál. Enkuantu iha tinan 2011-2014 envolve nu’udar membru iha Tim 5 ba draft Lei Mídia ne’ebé organiza hosi Sekretáriu Estadu Komunikasaun Sosiál.
Iha loron 16 fulan Setembru tinan 2020, Otelio Ote, eleitu nu’udar reprezentante órgaun komunikasaun sosiál mai iha Conselho de Imprensa ba períodu 2021-2025.
Membru Conselho de Imprensa ne’e aktualmente asume mós kna’ar nu’udar tekniku profesionál iha Kompania Timor Post no Responsável ba kanál Youtube (Online) Timor Post.
Iha loron 23 fevereiru 2023, simu posse husi Prezidente Parlamentu Nasional hodi asumi kargu nu’udar Prezidente Conselho de Imprensa ba restante mandatu tinan 2023-2025.
Otelio Ote hakotu iis ho idade 57 iha Hospital Referal RAEOA iha loron 28 Abril 2026 (03:35) tanba sofre moras komplikadu, nune’e la konsege salva nia vida.
