TL Sei Lidera Prezidensia ASEAN Iha Tinan 2029
Imajem: Presidente Repúblika Jose Ramos-Horta iha ambitu selebrasaun loron Restaurasaun Independénsia ba dala-24 iha Tasi-Tolu, 20/05/2026
SAPNewsTL, Dili : Iha ámbitu selebra loron restaurasaun independénsia ba dala-dala-24, Prezidente Repúblika Jose Ramos-Horta afirma tinan 2029 TL sei lidera Prezidensia ASEAN, iha dezafiu maibe aprezenta mós oportunidade sira ne’ebé labele espera.
Marciana da Conceição – SAPNewsTL
“Iha tinan 2029, Timor-Leste sei asumi Prezidénsia ASEAN nian, dezafiu boot ida maibé mós ida ne’ebé aprezenta oportunidade sira ne’ebé labele imajina iha tinan balun liubá”.
“Transformasaun sira-ne’e hotu só iha sentidu loloos bainhira reflete iha ema nia moris konkretu. Iha moris-di’ak família sira-nian, asesu ba kuidadu saúde, kualidade edukasaun no oportunidade sira ne’ebé fó ba ita-nia foin-sa’e sira maka, ikusmai, sukat susesu ita-nia dalan nu’udar Nasaun”.Dehan Prezidente Repúblika Jose Ramos-Horta liu husi nia diskursu ofisial iha Tasi-Tolu, 20/05/2026.
“Ita hateke ho atensaun ba progresu ne’ebé ita halo ona iha dezenvolvimentu umanu no, ho klareza hanesan, ba dezafiu sira ne’ebé maka persiste nafatin”.
PR Horta akresenta, Timor-Leste nu’udar pais ida-ne’ebé, maske nia joven, konsistentemente afirma nia an iha mundu, hodi reforsa relasaun ho país belun no viziñu sira no konsolida nia prezensa iha rejiaun no planu internasionál.
Iha CPLP, iha ASEAN, iha Fórum Illa Pasífiku nian, iha Grupu g7+ no iha sistema Nasoins Unidas nian — ho tempu hanesan adota no kumpri konvensaun internasionál relevante sira.
Iha perkursu afirmasaun esterna ne’e, destaka adezaun ba Organizasaun Mundiál Komérsiu (OMC) no ASEAN, marku diplomátiku sira ne’ebé define Timor-Leste nia pozisaun iha rejiaun no iha mundu.
Entretantu marka prezensa iha serimonia loron restaurasaun independénsia ba dala-24 iha Tasi-Tolu maka Prezidente Repúblika Jose Ramos-Horta, Primeiru-Ministru Kay Rala Xanana Gusmão, Prezidente Tribunál Rekursu, Prezidente Parlamentu Nasionál, hamutuk ho membru guvernu sira hotu inklui veteranus no povu Timor-Leste.
