Kazu Foti Osan Iha Manatutu, Suspeitu VC Promete Devolve Hikas ! Rekunhese & Koopera Folin Aas
Imajem:
SAPNewsTL, Manatuto : Joven na’in rua ne’ebe bosok no hadau osan 3.000 husi Manuel da Silva de Oliveira nia liman ne’ebe akontese iha loron 2 Maiu, suspeitu VC konsege rekunhese sala no koopera ona ho parte vitima hodi devolve hikas osan ne’ebe foti.
Naturalmente ema hotu la perfeitu iha mundu, kada ema iha ninia frakeza no kbit atu tetu, hanoin no deside ba ninia hahalok sira. Hafoin halo sala liu tiha oras, loron ka semana sempre iha sentimentu arrependimentu no halo refleksaun hodi hamrik fila fali hosi ninia sala (monu ba tentasaun). Lisaun ne’e akontese ba VC ne’ebe monu iha tentasaun maibe nia konsege rekunhese ninia sala no hamrik husi ninia falla hodi asume responsabilidade ba sala ne’ebe komete.
Suspeitu ho inisial VC deklara fo fila osan ba Manuel liu husi deklarasaun no konkordansia husi parte rua, nune’e suspeitu selu uluk rihun ida atus lima (1.500) no promete sei fo fila osan restu iha loron 14/06/2026.
“Deklarasaun ohin loron Domingu 17/05/2026 oras 14:47, ha’u ho naran kompletu: V.C ho Familia ohin loron hakarak selu fila fali osan ne’ebe ha’u foti iha Manuel $3.000 iha data 02/05/2026”.
“Nune’e, ha’u sei entrega fila fali osan no fo uluk rihun ida atus lima ($1.500) no fulan oin iha data 14/06/2026, hafoin ha’u selu tan $1.500. Mak ne’e deit ha’u nia deklarasaun badak”. Dehan suspeitu liu husi nia deklarasaun iha eskuadra Pokisia postu polisia Manatutu Vila, Domingu 17/05/2026.
Iha fatin hanesan, Vitima Manuel da silva de Oliveira konkorda ho suspeitu no nia familia ne’ebe deside fo fila osan sorin $1.500.
“Deklaração ohin dia 17/05/2026 ami halo akordu kona-ba atu rezolve problema no fo fila osan $3.000, no ha’u nu’udar osan nain ho naran kompletu Manuel da silva de Oliveira hatan ona kona-ba suspeitu ho nia familia ne’ebe promete katak atu fo fila osan ho montante $3.000 no ha’u sei simu uluk osan $1.500 iha loron ohin 17/05/2026 oras 14:54 no ha’u sei simu tan fali osan $1.500 iha data 14/06/2026 iha loron Domingu” Manuel informa
Entretantu husi akordu ne’e hetan konkordansia husi parte rua no akompanha husi Polisia Esquadra Polisia Postu Manatutu Vila no sasin husi familia suspeitu no vitima.
Tuir kronolojia ne’ebe antes ne’e fo sai katak vítima Manuel da Silva de Oliveira halo komunikasaun hasoru malu no fasilita sosa osan mean, maibe wainhira to’o iha Manatuto, suspeitu ne’e bosok no hadau osan 3.000 husi nia no halai.
“Antes ne’e nia kontaktu mai dehan nia iha ema ne’ebe nia konhese fa’an osan mean iha Manatuto. Ha’u ho patraun sai husi Dili tuku 17:00 no to’o tuku 19:00, ami konsege hasoru no ko’alia ba malu, sira hadau osan ne’e iha tuku 20:00 liu”. Informa Manuel da Silva de Oliveira ba SAPNews iha Manatuto, 02/05/2026.
