EhD Mental HX Tuda Kanek Agostinho & Estraga Sasan Uma-Laran
Imajem: Agostinho da Silva ne’ebe hetan tuda husi EhD ho inisial HX to’o rezulta kanek iha ulun no estraga sasán uma laran inklui motor ida iha Maukaidare, 18/05/ 2026. Foto: SAPNewsTL
SAPNewsTL, Viqueque : Ema ho Defisiensia (EhD) mental ho inisial HX tuda Agostinho da Silva no estraga sasán uma laran inklui motor ida iha Maukaidare, aldeia Alaoli, suku Waniuma, Postu Administrativu Uatucarbau, Munisípiu Viqueque.
Daniel Silva & Vinsensius Morais – SAP News Plus
Kazu ne’e akontese maizumenus tuku 08:30 OTL kalan, Agostinho da Silva hetan tuda husi EhD ho inisial HX to’o rezulta kanek iha ulun no estraga sasán uma laran inklui motor ida iha Maukaidare, 18 Maiu 2026.
Tuir sasin Hermelinda Baptista haktuir, nia laen foin fila husi natar no han hela ho nia oan mane, derepente EhD ho inisial HX ba sira-nia uma, entaun nia halo kafé no fó hahan, hafoin nia lori ai hodi baku, estraga sasan uma laran inklui tuda Agustinho to’o rezulta kanek.
“Ha’u-nia laen foin mai husi natar no sei han hela ho nia oan mane boot, derepente nia mai hodi tur iha ne’e, ami hanoin ema normál nu’udar familia ne’e mak foufoun husu etu maibé lakleur husu tan kafé, ha’u halo tan kafé ba nia lakleur ha’u nia oan mai derepente nia hakilar dehan taka tiha ahi ne’e para ha’u ba soe bee”. Informa sasin Hermelinda Baptista iha Uatucarbau, 18/05/2026
Sasin ne’e hatutan, hafoin nia fila hosi soe bee, nia halo kedas agresaun fiziku hodi baku rahun motor no sasan uma-laran.
“Hotu mai fali lori ai ida hodi baku ami-nia didin loloon sira ne’e no dada kotu tiha ami-nia ahi ne’e mak ha’u hakilar “nusa mak dada kotu ami-nia ahi no estraga ami-nia sasán. Derepente ha’u-nia katuas oan halai mai tan ho raan katak hetan tuda ho termus bee manas nian”. Dehan Hermelinda Baptista ba SAPNews iha Viqueque.
Hafoin notisia ne’e publika, Sapnews Pro seidauk halo komfirmasaun ho parte Autoridade Lokal no segurança iha Postu Administrativu Uatucarbau, Munisipiu Viqueque.
