Inundasaun Iha Zumalai: Xefe Suku Tazhilin Husu MOP Halo Ponte Ho Kualidade
Imajem: Xefe suku Tazhilin Afonso Sarmento Martins & komunidade suku Tazhilin iha postu administrativu Zumalai, Suku Tazhilin, Munisípiu Covalima. Foto: SAPNewsTL
SAPNewsTL, Covalima : Relasiona ho ponte ne’ebé kotu iha postu administrativu Zumalai Suku Tazhilin Munisípiu Covalima, Xefe suku Tazhilin Afonso Sarmento Martins husu ba autoridade Munisípiu no servisu Obra Públika atu tau atensaun sériu ba ponte ne’ebé durante ne’e kontinua hetan estragus no afeta inundasaun maka’as ba komunidade durante tempu udan boot.
Xefe suku Tazhilin Afonso Sarmento Martins hateten, ponte ne’e tinan-tinan hetan reparasaun, maibé la dura no kontinua fo risku ba komunidade sira ne’ebé utiliza dalan refere.
“Ha’u husu ba autoridade munisípiu no obras públikas atu fó atensaun ba ponte ne’e. Karik aban-bainrua halo konstrusaun, labele halo modelu hanesan dadaun ne’e tanba tinan-tinan estadu investe osan ba ponte ne’e, maibé la dura.”Dehan Xefe suku Tazhilin Afonso Sarmento Martins ba jornalista SAPNews iha fatin akontesimentu Kuarta-feira 20/05/2026.
Xefe Suku Tazhilin hatutan, obra sira kontinua halo la tuir padrãun kualidade, estadu sei nafatin gasta osan bebeik maibé komunidade la hetan benefísiu ne’ebé di’ak.
“Se hanesan ne’e bebeik, estadu kontinua investe osan maibé ponte la iha kualidade no komunidade nafatin terus.” Nia informa.
Afonso mos rekomenda ba autoridade kompetente sira, inklui Prezidente Autoridade Munisipal (PAM), atu tun direta ba terrenu hodi halo identifikasaun no fiskalizasaun didi’ak antes implementa projetu.
“Administrador Munisipiu iha futuro tun mai indentifika didiak para labele halo modelu hanesan ne’e bebeik se hanesan ne’e bebeik estadu kontinua investe osan maibé ponte la iha kualidade.”
“Dala ruma bainhira ami halo fiskalizasaun, ami fó hanoin katak modelu ida ne’e la di’ak, maibé sira dehan BoQ (Bill of Quantities) mak haruka no tenke tuir deit, maibé rezultadu laiha kualidade.” Nia Sublina.
Nia esplika, problema ne’e mos akontese tanba bee-dalan ne’ebé halo la luan no klot deit, nune’e foer sira fasil tama no taka dalan bee nian bainhira tempu udan. Situasaun refere kontinua fo risku ba komunidade no utilizadór estrada sira.
” Tinan-tinan hanesan ne’e beibeik, tanba sira halo bee dalan la luan maibe halo klot deit entaun foer sira mai taka, no obras publika mak tun direta ba hamos maibe la tau atensaun entaun tempu udan bee mota tun lori ai sira husi leten mai taka tomak tiha, nune’e nafatin fo risku ba komunidade sira.” Nia esplika
Autoridade lokal husu atu halo ponte foun ho moru protesaun atu prevene risku ba komunidade iha Suku Tazhilin, inklui afeta edifísiu Eskola Báziku Sentral Tazhilin, Kapela no movimentasaun ema no transporte ne’ebé liga ba munisípiu no nasional.
“Ponte ne’e tenke halo fali foun no halo mos ninia moru protesaun tanba laiha moru nafatin fo risku ba komunidade Tazhilin, aldeia Kulu-oan no afeta mos ba eskola, kapela, natar no mos fo risku ba transporte Publiku ba munisipiu no ba nasional.” Nia Salienta
Entretantu Suku Tazhilin iha aldeia haat, no aldeia tolu mak hetan afeta liu bainhira udan boot. Hanesan Aldeia Baura-ikun, Galitaz no Kulu-Oan, enkuantu Aldeia Basana la hetan impaktu boot tanba lokaliza iha área foho.
