Proteje Jovens Uza Internet Ho Seguru & Responsavel ! APFTL & CFTL Lansa Aplikasaun Swipe Safe
Imajem: Prezidente APFTL Benvinda Alves Gusmão hamutuk ho estudante, joven no manorin sira lansa Acount Aplikasaun Swipe Safe iha salaun HAK, Farol 26/05/2026. Foto: SAPNewsTL & Média APFTL
SAPNewsTL, Dili : Alumni Parlamentu Foinsa’e Timor-Leste (APFTL) servisu hamutuk ho Chilfund Timor Leste (CFTL) lansa Acount Aplikasaun Swipe Safe ho objetivu tulun labarik no joven sira utiliza internet ho seguru no responsabilidade.
Marciana Conceição & Dircia Belo – SAPNewsTL
Prezidente APFTL Benvinda Alves Gusmão hateten APFTL hamutuk ho Chilfund lansa Acount Aplikasaun Swipe Safe hodi apoiu seguransa internet ba komunidade sira liu-liu joven sira iha Timor-Leste.
“Swipe Safe, ne’e hanesan abordajen ida ne’ebé maka APFTL halo servisu hamutuk ho Chilfund Timor-Leste no sira maka dezenvolve aplikasaun ne’e nu’udar plataforma ida oinsa maka bele utiliza hodi apoiu seguransa internet nian bainhira hasoru problema ruma iha internet, oinsa maka sira bele rezolve”. Dehan Prezidente APFTL Benvinda Alves Gusmão ba Jornalista sira iha salaun HAK, Farol 26/05/2026.
Lideransa APFTL ne’e informa, aleinde fo formasaun ba estudante sira APFTL mos fo formasaun ba inan aman sira, oinsa bele asegura sira nia oan iha utilizasaun internet.
“Informasaun ne’e ami fahe liu husi estudante sira implementa ona iha tinan 2023 iha munisípiu Lautem no Dili, aleinde fahe informasaun ba estudante sira, ami mos fahe informasaun ba inan aman sira, oinsa mak bele asegura no tau matan ba sira nia oan ne’ebé maka utiliza internet”. Nia subliña.
Aplikasaun Swipe Safe nu’udar plataforma dijital ida ne’ebé fornese konteúdu edukativu kona-ba utilizasaun internet seguru no responsavel.
Materia sira ne’ebé iha aplikasaun ne’e kobre konseitu prinsipal sira kona-ba internet, seguransa online, prevensaun risku dijital hanesan cyberbullying, eksplorasaun sexual online, difuzaun informasaun falsu no forma seluk ne’ebé bele afeta ba labarik no joven sira.
Aplikasaun ne’e dezenvolve atu tulun labarik no joven sira komprende oinsa utiliza internet ho diak, kritiku no responsavel, nune’e bele garante sira-nia direitu atu asesu informasaun ho seguru no livre husi ameasa sira ne’ebé bele prejudika sira-nia moris iha sosiedade.
Atu asegura implementasaun ne’ebé efetivu no sustentável, iha fulan Marsu 2026 APFTL realiza ona Training of Trainers (TOT) kona-ba aplikasaun Swipe Safe ba profesores no jestor Sentru Juventude. Atividade TOT ne’e fó kapasitasaun no koñesimentu adekuadu kona-ba utilizasaun aplikasaun Swipe Safe, metodolojia fasilitasaun ho forma fahe materia ba benefisiariu sira.
Enkuantu, iha fulan Marsu 2026 APFTL hamutuk ho CFTL fornese ona TOT kona-ba Aplikasaun Swipe Safe ba manorin no jerente sentru juventude husi munisipiu Dili, Ermera, Liquisa no Manatutu, nune’e kontinuasaun hodi pratika aplikasaun refere iha eskola sekundariu sira no sentru juventude sira mak ekipa halo ona instalasaun APPS.
