Prepara Juventude Ba Merkadu Traballu: Opi-Op Oferese Kursu Kualidade Ba Timoroan Sira
Imajem: Broxure rejistrasaun Fundasaun Opi-Op
SAPNewsTL, Dili : Fundasaun Opi-Op ofisialmente loke rejistrasaun ba foinsa’e feto no mane sira iha area Ingles, Portugés, Espanhola, Farmásia, Saúde Públika, Akontabilidade no Jornalismu. Kada kursu dura durante fulan tolu no enkontru dala tolu kada semana.
Fundasaun Opi-Op Timor-Leste nu’udar espasu aprendizajem ba jovens no foinsa’e sira hodi hamutuk, fahe hanoin, halibur ideia, no halo asaun ba dezenvolvimentu nasional liu hosi transforma no muda mentalidade foin-sa’e sira-nian ho hanoin krítiku, edukadu, formadu, sivilizadu, kompetitivu no demokrátiku.
Presidente Fundasaun Opi-Op Carlos Gusmão hateten sentru formasaun ne’e hodi ajuda Timoroan sira hodi tuir formasaun ne’ebe kualidade no relevante ho merkadu traballu hodi kontribui ba prosesu dezenvolvimentu iha nivel nasionál.
“Formasaun ne’e bazeia ba nesesidade merkadu liu hosi kria kursu, diskusaun, semináriu, workshop, no atividade akadémika sira seluk hodi dezenvolve no kapasita Timoroan sira iha lian Ingles, Portugés, Espanhola no Ingles ba Labarik, kursu farmasia, saúde públika, akontabilidade, no jornalizmu”
Carlos Gusmão sublinha Opi-Op hari’i ho vizaun atu atinji sosiedade Timor-Leste ida ne’ebé profesonál, kompetitivu, inovativu, sivilizadu, saudavel, krítiku, justu, no foka ba felisidade komun ba sidadaun ida-idak.
Fundasaun ne’e sei promove no kapasita foin-sa’e sira iha area oioin hodi kontribui prosesu dezenvolvimentu nasionál.
“Kria espaşu adekuadu ba foin-sa’e sira liuhusi sentru formasaun, halo diskusaun, semináriu, workshop, no atividade akadémika sira seluk hodi dezenvolve kumhesimentu, abilidade no atetude joven sira nian”.
Sentru formasaun ne’e lokaliza iha resintu Sede Suku Bidau Santada ho ambiente ne’ebe seguru, komfortavel, no livre husi barullu, nune’e konvida joven sira ne’ebe seidauk hetan oportunidade kursu liliu iha area mensiodanu iha leten bele halo rejistrasaun hodi tuir kursu.
Formasaun ne’e kompostu hosi departamentu hitu hanesan lingua ingles, portugés, espanola, kursu farmasia, saúde públiku, akontabilidade no jornalizmu, kada formasaun sei dura durante fulan tolu, kompleta ho semináriu no enkontru dala tolu kada semana.
Kada kursu kandidatu formandu sira sei rejistu ho folin $25.00, osan ne’e sei uza ba kamizola, módulu kursu, kartaun no sertifikadu. Enkuantu kada kursu sei $10 kada fulan (Portuges, Espanhola, Saúde Públika, Ingles for Children no Jornalismo), $ 15.00 kada fulan ba Ingles no $35.00 kada fulan akontabilidade.
Formador sira sei mai hosi professional timoroan sira ne’ebe remata ona area espesializadu iha lisensiatura ba kada kursu iha nivel universidade nasionál no internasional.
Kritériu Rejistu bele asesu iha broxure kraik no informasaun detallu bele kontaktu ba númeru 74190167/75849656.
