Asu Han Bebe 1 Iha Ainaro, PNTL Asegura Inan Ne’ebé Soe
Imajem: Polísia Nasionál Timor-Leste (PNTL) kaer inan feto ida ne’ebe deskonfia soe bebe iha Maubisse, munisípiu Ainaro, 15/06/2026. Foto : 𝐌𝐞𝐝𝐢𝐚 𝐏𝐍𝐓𝐋.
SAPNewsTL, Ainaro : Komunidade hetan bebe ida ho kondisaun isin la kompletu tanba asu han ona, nune’e Polísia Nasionál Timor-Leste (PNTL) kaer inan feto ida ne’ebe deskonfia soe bebe iha Maubisse, munisípiu Ainaro.
Tuir publikasaun ne’ebe Sapnews.com asesu liu hosi pagina PNTL sublinha katak Autoridade Seguransa Polísia Nasionál Timor-Leste (PNTL) Munisípiu Ainaro identifika inan ida ho inisial AMCS, tinan 18, ne’ebé suspeita soe nia bebe iha área Bairu Cina Uma, Aldeia Maubisse Vila, Suku Maubisse, Postu Administrativu Maubisse, Munisípiu Ainaro.
“Kazu ne’e deskobre hafoin komunidade sira hetan bebe nia isin mate ne’ebé la kompletu tanba parte balun hetan husi asu han ona”. Ainaro, 15/06/2026. Sita Media PNTL
Kazu refere akontese iha loron 14 Juñu 2026 tuku 07:00 dader, komunidade sira ne’ebé deskobre bebe nia isin mate ne’e komunika kedas ba Polísia Eskuadra Maubisse. Nune’e ekipa polísia ba lokal akontesimentu hodi asegura evidénsia no transporta bebe nia isin mate ba Mortuáriu Hospital Referál Maubisse hodi hein prosesu autópsia.
Nune’e iha loron 15 Juñu 2026, PNTL Munisípiu Ainaro halo koordenasaun servisu eskuadra polisia Maubessi hodi realiza operasaun konjunta hodi buka no identifika suspeitu ne’ebé envolve iha kazu ne’e.
Durante operasaun ne’e, forsa konjunta konsege identifika suspeitu ho naran inisial AMCS, tinan 18, ne’ebé hala’o hela tratamentu saúde iha Hospital Referál Maubisse.
Tuir rezultadu investigasaun inisiál, suspeita ne’e mak inan husi bebe ne’ebé hetan mate no soe iha área refere.
Hafoin halo prosesu identifikasaun no rekolla informasaun preliminár sira, autoridade sira lori suspeita ba Komandu PNTL Munisípiu Ainaro atu hala’o prosedimentu legal sira. Depois prosesu identifikasaun remata, suspeitu refere fila ba nia hela-fatin, maibé sei nafatin iha observasaun no kontrolu autoridade kompetente sira hodi hein prosesu legal no desizaun hosi tribunal tuir lei ne’ebé vigora iha Timor-Leste.
Dadaun ne’e PNTL Munisipiu Ainaru kontinua hala’o investigasaun hodi apura faktu hotu-hotu relasiona ho kazu ne’e no garante katak prosesu legal lao tuir dalan ne’ebé loos no justu.
