Atualiza Progresu Agrikultura, CCT Exporta Kafé Tonelada 10 Ba Estados Unidos
Imajem : Presidente CCT Mário Soares iha Palásiu Prezidensiál Nikolau Lobato, 20/07/2026. Foto : Média PR
SAPNewsTL, Dili : Equipa husi kooperativa Kafé Timor (CCT) hala’o sorumutu ho Prezidente Repúblika José Ramos-Horta hodi apresenta relatóriu kona-ba progresu servisu no dezenvolvimentu agrikultura iha kafé, vanila, kakau, ai-senge no pimenta.
Prezidente CCT, Mário Soares, hateten objetivu husi enkontru ne’e atu informa ba Xefe Estadu kona-ba servisu no progresu CCT iha setor agrikultura.
”Ami mai hasoru Prezidente Repúblika atu aprezenta de’it servisu CCT. Ami agora dezenvolve kafé, vanila, kakau, ai-senge no pimenta iha munisípiu sira.” dehan Presidente CCT Mário Soares ba jornalista sira iha Palásiu Prezidensiál Nikolau Lobato, 20/07/2026.
Nia hatutan kafe kontinua sai produtu prinsipál ne’ebé fó kontribuisaun ba ekonomia Timor-Leste liu husi exportasaun ba merkadu internasional liuliu ba Estados Unidos.
“Kafé tinan-tinan fó apoiu ba nasaun tanba exportasaun ba rai sira ne’ebé presiza kafe, liu-liu Estados Unidos.” Nia Salienta
Mário Soares esplika, produsaun kafe muda ona kompara ho tinan sira kotuk tanba impaktu mudansa klimátika.
“Produsaun kafe la hanesan ona ho uluk. Iha 2025 produsaun aas, maibé iha 2026 tun tanba mudansa klimátika. Ida-ne’e mos depende ba prokura husi sosa-na’in sira, folin kafé iha merkadu internasional mós aumenta kompara ho tempu uluk.”
Prezidente CCT mos informa kolheta kafe barak liu mai husi munisípiu lima mak Ermera, Liquiçá, Aileu, Same no Ainaro, enkuantu produtu agríkola seluk hanesan vanila, kakau no pimenta espalha ona ba munisípiu sira seluk.
”Kafé barak liu mai husi Ermera, Liquiçá, Aileu, Same no Ainaro. Ba produtu seluk, ami implementa ona iha munisípiu barak hanesan Viqueque, Lautém, Covalima, Manatuto no Manufahi.” Nia informa.
Durante enkontru, Prezidente Repúblika fó rekomendasaun ba CCT atu kontinua hasa’e produsaun kafé.
“Rekomendasaun husi Prezidenti Repúblika ne’e atu hasa’e kafé nia produsaun maibe depende ba servisu ne’ebe ita iha”.
Nia sublinha, CCT prepara hela kolheta foun ba kafe no vanila, no kontinua halibur produtu husi agrikultór sira hodi prepara exportasaun. Tuir planu ba kakau, CCT iha ona kontainer rua ne’ebé sei haruka ba merkadu internasional iha fulan oin.
”Iha fulan Maiu 2026, CCT exporta tan konténedor ida ho kafe hamutuk tonelada 10 ba Estados Unidos. Ba kakau, CCT exporta kontainer ida ho tonelada 23 iha tinan kotuk, enkuantu pimenta mos to’o tonelada 10.”
Entretantu, iha tinan kotuk CCT exporta konténedor kafe hamutuk 75 ba Estados Unidos América, Austrália, Nova Zelândia no Japaun.
