Kondena Aktu JBS Ho Matan-Ween ! AMA : “Ha’u La Nonok & Lakohi Feto Sira Sai Atan Ema Ne’ebe Kaer Poder”

Imajem : Vítima AMA ho nia inan iha Aileu, 16/07/2026

SAPNewsTL, Aileu : Vítima gravida Alda Maria Alves (AMA) denunsia ba públika kona-ba JBS (atual PAM-A) ne’ebe halai ses hosi respinsabilidade, entretantu JBS deklara la halai ses maibe bazeia ba akordu família rua no ezije teste DNA (Deoxyribonucleic Acid) ba bebe iha inan nia kabun laran.

‎Vítima Alda Maria Alves hateten nia parte sai vítima ba João Bosco dos Santos, atual Presidente Autoridade Munisípiu Aileu (PAM-A) tanba hetan isin rua maibe nia halai ses husi nia knar nu’udar aman.

‎”Ha’u husu ba autoridade kompetente sira iha governu (PM & MAE) atu tau atensaun ba aktus imoral no desrespeitu ba feto iha Aileu ne’ebė komete husi Presidente Autoridade Munisipiu Aileu”.

‎”Ha’u hanesan feto ne’ebé vítima dala hira ona inklui kolega feto seluk ne’ebé vitima ba aktus imoral husi Sr. João Bosco dos Santos atual Presidente Autoridade Munisipiu Aileu, maibe sira hola dalan ho resolve nonok, ha’u la nonok tamba ha’u lakoi ha’u-nia kolega feto sira seluk iha Aileu kontinua sai atan ba ema sira ne’ebé maka kaer poder atu halimar ami-nia isin”. Deklara Vítima Alda Maria Alves iha Aileu, 16/07/2026

‎Vítima konta “antes ne’e hau ho JBS tuir malu no nia rasik ba to’o iha ha’u-nia famlia nia oin hodi husu ha’u, maka ha’u-nia familia aseita hodi simu nia, ikus ha’u hetan bebe ida ne’ebé hein atu partus deit, maibe infelismente liga ho asuntu servisu nian ne’ebé vizita husi Primeiru Ministru nian iha Aileu iha dia 26 de Fevreiro de 2026 iha Salão Timor Klaran, iha Pessola balu sita aktus imoral ne’ebé maka durante ne’e halo iha Aileu, hetan kedas reazem husi Primeiru Ministro no Ministro Estatal”.

‎”Nune’e, iha dia 14 de Março de 2026 nia lori deklarasaun ida ho logo PARTIDU CNRT nian, hamutuk ho Sr. Armando Soko hanesan Koordenador Partidu CNRT postu Aileu vila ho lia nain Sr. Alberto Siqueira no José da Costa Gusmão hodi dehan ami resolve tuir familia maibe deklarasaun ho LOGO PARTIDU CNRT nian, nune’e mos ho razaun ne’ebé nia dehan maka ita halo deklarasaun ne’e atu taka falta hodi hatan ba poder lokal no problema ne’ebé maka ita enfrenta”. Vítima konta (maibé JBS nega no husu evidénsia)

‎Tuir mai, sira aseita malu katak mane nia responsabiliza hodi fo osan ho montante $ 5.000 (Cinco Mil dolares Amerikanu) hodi tau matan ba labarik, maibe infelismente iha deklarsaun ne’e nia laran komprome mos katak osan refere laos fo rohan ba kuidadus ne’ebé nu’udar aman sei kontinua responsabiliza to’o labarik ba eskola, atinji idade ema bo’ot nia katak to’o idade 18 anos.

‎”Ikus mai seidauk resolve hotu, ha’u atu besik partus presiza nia apoiu moral hanesan aman ba ami-nia oan, maibe nia blokeia hotu hau-nia numeru kontaktu ikus mai hau rona fali dehan Sr. ne’e hola fali funsionaria kontratadu ida ne’ebé maka nia rasik kontratu iha nia Gabinete”. Nia sublinha

‎Maria Alves husu ba Primeiru Ministru no Ministru Administrasaun Estatal hodi foti medida rigorozu hasoru JBS tanba halo feto sai vítima no vulneravel iha munisípiu Aileu.

‎”Ha’u husu ba Primeiru Ministru no Minsitru Administrasaun Estatal atu foti medida urjente no rigorosu ba aktus imoral ida ne’e, laos hau mesak mak sai vitima, ha’u-nia kolega feto balun mos, no laos foin maibe bebeik ona no uza poder hodi halo desizaun ne’ebé prevalesa deit ba nia an.

‎AMA konsidera JBS uza nia poder hodi hamonu intergidade estadu nian no Partidu CNRT, uza partidu hodi halimar ba nia interese liu hosi asume pasta hanesan Presidente Autoridade para goja nia vida hodi la respeita feto sira no abuzu poder iha desizaun sira servisu estadu nian.

‎”Husu ba Presidente FADA ho estrutura tomak no Koordenador Partidu CNRT AILEU atu foti mós desizaun ne’ebe maka rigorosu, labele nonok no dukur ba aktus imoral ne’ebe lider sira halo iha Aileu”. Nia husu

‎Iha sorin seluk, PAM-A JBS deklara nia parte la halai ses hosi responsabilidade tanba iha karta deklarasaun ne’ebe parte rua asina iha momentu ne’ebá katak laiha komprimissiu ba feen no laen.

‎”Ha’u la aseita dehan ha’u halai ses hosi responsabilidade (JBS laos hanesan PAM-A), ha’u responsabiliza bazeia ba akordu ida ne’e katak familia rua ho ami nain rua laiha kompromissiu atu to’o sai uma kain, ami rua sei kuidadu ba labarik no fo 5.000 USD hodi tau matan ba bebe la nesesariamente depende ba mane no ami konkorda tau matan ba eskola”.

‎”Maske labarik ne’e la’os ha’u-nian, ha’u ba hanesan Joâo Bosco laos hanesan PAM-Aileu, ami rua aseita malu, deklarasaun ne’e ami hotu asina, oan ne’e sei lori ba teste DNA, se ha’u nia oan ha’u lori mai trata nia ba eskola to’o boot. Se teste DNA mak laos ha’u-nia oan, ha’u sei ezije no selu naran diak ho duas vezes, ha’u prontu responsabiloza”. nia deklara.

Enkuantu, parte rua deklara atu lori ba tribunal hodi buka justisa ba kazu refere iha tempu badak, hafoin notísia ne’e publika, SAP News TL seidauk halo komfirmasaun ho parte relevante sira ne’ebe trata kona-ba direitu no dignidade feto hanesan JUS, Rede Feto, ALFELA, Provedoria dos Direitus Humanos e Justisa.