Alunos Pre-Eskolar Haat Iha Postu Luro Simu Graduasaun

Imajen Alunos Escola Pre-Escolar Haat Iha Postu Administrativu Luro, Lautem, 12/12/2022. Foto : Luis dos Santos

SAPNewsTL, Lautem: Escola Pre-Escolar Haat Iha Postu Administrativu Luro realiza graduasaun da dahuluk ho tema “Promove Edukasaun Sedu Ba Labarik Sira Liu Husi Pre Eskolar” ho estudante hamutuk atus ida (100) iha salaun Paroquia Nossa Senhora Rainha dos Apostolos Luro

Iha intrevista Responsavel Pre-Escolar Suku Luro, atual Xefe Komisaun Organizadora ba Serimónia Graduasaun Pre-Escolar Dahuluk ne’e haktuir seromónia graduasaun ne’e foin halo primeira vez iha Postu Administrativu Luro maske Pre-Escolar ne’e hari’i iha 2015 maibé wainhira kontinua harii iha 2020 sira haree katak sira bele hamutuk hodi realiza graduasaun.
“Serimónia ne’e foin primeira vez ne’ebe ami halo iha Postu Administrtivu Luro, Pre-Eskolar iha Postu Luro ne’e hahú estabelese iha 2015 ami nunka halo graduasaun, tuir mai 2020 lider komunitariu hamutuk ho komunidade sira estabelese tan iha Suku tolu hanesan Cotamuto, Baricafa no Wairoque, ho ida ne’e ami sente katak ami mos bele tau laran metin ba malu hodi nune’e ami bele realiza ami nia graduasaun ida ne’e ba primeira vez iha Postu Luro”. Dehan Komisaun Organizadora ba Seromónia Graduasaun Pre-Escolar tinan 2022 ba Dahuluk Manuela dos Reis iha Salaun Paroquia Rainha dos Apóstolos Luro, 12/12/2022

Imajen graduadus ensinu Pre-Escolar Postu Administrativu Luro, iha salaun Paroquia Luro

Xefe Komisaun ne’e mos husu ba inan aman sira atu lori sira nia oan sira ba asesu Pre-Escolar hafoin ba Ensino Básico.
“Aproveita graduasaun ne’e ami hakerek ho nia tema Promove Edukasaun Sedu Ba Labarik Sira Liu Husi Pre Eskolar, ida ne’e mos liafuan motivasaun ida ba inan aman sira atu labele lori oan sira la’o liu de’it ba Ensinu Baziku primeiru ano maibe husi pre escolar mak ba ensinu baziku”. Nia apela

Imajen intervista Reprezentante Edukasaun Munisipiu Lautem Amelia Juleta Belo

Iha fatin hanesan Reprezentante Edukasaun Munisipiu Lautem Amelia Juleta Belo mos enkoraja nafatin professor sira atu nafatin iha vontade hodi hanorin labarik sira maske sei iha vida voluntáriu.
“Ha’u hatene katak ami nia Profesor sira ne’ebe hanorin iha Pre-Escolar ne’e barak mak voluntáriu maibé ha’u fiar katak ami sei fo korajen nafatin no fo motivasaun nafatin atu sira bele iha vontade di’ak nafatin atu bele hanorin oan sira maske sira hasoru difikuldade barak, dezafiu barak maske seidauk iha formasaun adekuadu”. Tenik nia

Entretantu, estudante Pre-Escolar ne’ebe partisipa iha graduasaun ne’e hamutuk atus ida (100), limanulu resin neen (56) husi Pre-Escolar Alahira- Luro, husi Baricafa hamutuk ruanulu resin rua (22), Sanulu resin hitu (17) husi Suku Cotamuto no nain haat (4) husi Suku Wairoque.
Enkuantu iha serimonia graduasaun ne’e partisipa husi Edukasaun Munisipiu Lautem, Reprezentante Admistrador Postu Luro, Polisia Eskuadra Postu Luro, Autoridade Lokal, Profesor sira husi Suku haat no inan aman graduadus sira.

Jornalista: Luis dos Santos