Klube Hotu Aseita, LFTL Sei Realiza Liga Timorense Iha Fevereiru

SAPNewsTL, Dili: Orgaun Liga Futebol Timor-Leste sei hahu Liga Timorense epoka 2022-2023 iha loron 17 fulan fevereiru 2023 tanba klube divizaun dahuluk no daruak aseita hotu ona.

“Ita nia jogu kick off iha loron 17 fulan fevereiru 2023 no sei remata iha loron 30 fulan abril selae inisiu fulan maiu ne’eba ami reafirma fali rejistrasaun ba klube liuliu loke janela transferensia hahu husi loron 12 fulan janeiru 2023 to’o loron fulan 11 fevereiru 2023 tanba klube sira husi divizaun dahuluk no daruak Liga Timorense epoka 2022-2023 aseita hotu ona”, dehan diretor relasaun publika Diogo Neto Fraga ba jornalista sira iha Estadium Munisipal Dili kinta (12/01/2023).

Diretor hatutan, ohin sira mos enkontru ho reprezentante klube sira ne’ebe kontinuasaun anterior nian ajusta orsamentu ba klube sira para liga ne’e tenki lao ona maibe orsamentu ne’e sei prosesu tanba ohin sira ajustamentu depois haruka ba FFTL para bele manda orsamentu mai orgaun LFTL ne’ebe orsamentu sira kolia ho klube sira maibe seidauk bele fo sai tanba seidauk aprova

Entretantu, sira prontu atu kompete iha divizaun dahuluk no daruak epoka 2022-2023 maibe orsamentu iha konkordansia entre klube Sira, FFTL, no orgaun liga, mekanismu jogu sei utiliza metade kompetisaun deit no agradese ba klube sira hotu tanba ho sira nia protidaun hakarak salva futebol iha Timor-Leste hodi prontu kompete mesmu osan menus.

Iha fatin hanesan reprezentante klube divizaun dahuluk Osorio Florindo da Conceicão hatete, ohin sira enkontru ona LFTL ne’ebe suportasaun finanseiru sira aseita ona no sira prontu kompete iha Liga Timorense epoka 2022-2023 ne’ebe sei kick off iha loron 17 fulan fevereiru 2023.

“Ohin ami nia enkontru ho orgaun liga kontinuasaun sorumutu ho SEJD no FFTL, ami nia interese suportasaun finanseiru los ona ami aseita ona prontu kompete iha Liga Timorense epoka 2022-2023 iha loron 17 fulan fevereiru 2022 ne’ebe ami hein orgaun liga hasai karta rejistrasaun ba klube sira ami bele rejistu ona”, tenik Osorio

Osorio akresenta, orsamentu suportasaun ba klube sira hotu, sira sura ona durante jogu fulan rua ne’ebe sira nia interese klube los ona sira aseita joga ona maibe orsamentu suportasaun finanseiru sira agora seidauk bele informa depois mak FFTL ho LFTL fo sai ba publiku

Enkuantu, antes ne’e sira enkontru ho governu, SEJD husu ona para klube ho LFTL deside orsamentu ba jogu ne’ebe ohin LFTL konvoka reniaun ho sira reprezentante Klube divizaun dahuluk no daruak iha ona konkordansia ba orsamentu, kalendariu no durasaun jogu ne’ebe kontinuasaun sira hein deit LFTL tanba prontu konkorda regra husi orgaun liga.

Reportajen: Augusto dos Santos