Enkontru Entre G-VPM, MSSI & MEJD, Signi : Reklamante Subsidiu $ 200 Sei Simu Nia Direitu
Imajen : Intervista Vise Ministra MSSI Signi Verdial, iha salaun reuniaun G- VPM MSSI Caicoli, Dili kinta (9/02/2023).
SAPNewsTL, Dili: Ministeiru Solidaridade Sosial Inkluzaun (MSSI) ho Ministeriu Edukasaun Juventude Desportu (MEJD) halo enkontru trimisteral ba asuntu sosial ho Gabinete Vise Primeiru Ministru (G- VPM) hodi hametin koordenasaun efetivu kontribui ba kapasitasaun dezenvolvimentu instituisional ho sustentavel iha tinan 2023.
“Ohin ita enkontru organiza husi gabinete vise primeira ministra liga liu ba area asuntu sosial tanba kada lina ministeria mai relata rezultadu servisu iha trimestre ikus nian komesa husi fulan outubru to’o dezembru, ami nia tekniku sira halo apresentaun kona ba rezultadu ba obstakulu saida no rekomendasaun saida mak hetan iha trimestre ikus para mellora servisu Instituisaun diak liu tan ho sustentavel iha tinan 2023 “, dehan Vise Ministra MSSI Signi Verdial ba jornalista iha salaun reuniaun G- VPM MSSI Caicoli, Dili kinta (9/02/2023).
Vise Ministra hatutan, rezultado barak sira halo ona iha 2022 mak halo pagamentu subsidiu tinan ikus nian, bolsa inan sira nian ne’ebe atinji ho diak iha tinan 2022 maibe dezafiu maka alokasaun orsamentu iha inisiu tinan 2022 ne’e ho montante dollar amerikanu millaun 25 maibe tama ba tinan klaran, osan ne’e aumenta ba iha dollar amerikanu millaun 92 entaun montante orsamentu sa’e tiha, agora tama ba faze halo pagamentu ba reklamasaun sira hamutuk hamutuk nain-8812 mak sei selu iha tempu badak, no rezultadu sira seluk husi instituitu tutelada sira halo fundu rezerva seguransa sosial no mos mellora sistema informatika jestaun finanseiru nian.
Nia afirma, importante tebes atu mellora baze de dadus ministeriu nian no iha mos komentariu ba dokumentu dadus idozu sira nian hanesan bilete identidade ne’ebe daudaun ne’e servisu hela ho ministeriu estatal ho justisa no iha tempu badak sei asina akordu trimestrial hodi servisu hamutuk hodi bele atribui billete identidade ba sira nia benefisiariu sira
Ministeriu Edukasaun Juventude Desportu (MEJD) Armindo Maia
Iha Fatin hanesan, MEJD Armindo Maia hatete, ohin sira partisipa reuniaun koordensaaun ho G-VPM aprezenta atinjimentu, dezafiu no rekomedasaun hein katak tama ba 2023 bele diak liu tan
“Ohin ami partisipa iha reuniaun koordensaaun G-VPM ba asuntu sosial ami mai relata kona ba atinjimetu MEJD nian iha fulan tolu ikus, iha fulan outobru to’o dezembru iha 2022, aprezenta ami nia atinjimentu, dezafiu no rekomedasaun iha 2022 ne’ebe tama ba iha 2023 ne’e ami bele hakat ho diak liu tan”, Armindo hateten
Armindo akresenta, relata atinjimetu lubuk ida maibe iha lima prinsipal mak finaliza ezame nasional ba eskola hamutuk 94, finaliza preparasaun ba bolsa meritu, distribuisaun meza kadeira 20 mil ba eskola sira no formasaun ba profesor sira ne’ebe konsege gradua ema nain- 2500 no halo formasaun lingua portuges ba profesor sira iha trimestre ikus fulan outobru to’o dezembru 2022, sira mos relata kona ba dezafiu balun hanesan infraestratura edukativa prosesu la’o kleur tanba presiza verifika buat sira ba prosesu kontrusaun no rehabilitasaun, kestaun kona ba atribuisaun bolsa de meritu no falta de koordenaaaun lina ministerial sira ne’ebe ba oin presiza halo diak liu tan.
Jornalista : Aquelina Taek