Dalan Ba Moris Dignu, AUFD Realiza Treinamentu Litetasia No Numerasia Negosiu Ba Komunidade
Imajem Membru Assosiasaun Unidade Feto ba Dezenvolvimentu (AUFD), hafoin partisipa treinamentu Baziku Literasia no Numerasia iha suku Ritabou, Bobonara segunda (06/03/2023).
SAPNewsTL, Bobonaru : Assosiasaun Unidade Feto ba Dezenvolvimentu (AUFD), realiza treinamentu baziku literasia no numerasia negosiu ba komunidade sira no grupu Dodes iha aldeia Uat, suku Ritabou, Postu Administrativu Maliana, Munisipiu Bobonaru,
“Ita halo treinamentu literasia no numerasia negosiu ho objetivu hasa’e konhesimentu grupu kona ba agrikultor substensia komersial, funsinamentu numerasia, abilidade negosiu no mos oinsa atu hasa’e liu tan kapasidade liu-liu mak inan-aman moris ho agrikultura hodi nune’e halo produsaun ba produtu lokal transforma fila-fali ba agrikultor komersial, tanba dala barak bazeia ba dadus, inan-aman agrikultor sira ho joven agrikultor sira barak mak sei menus kapasidade, oinsa atu halo transformasaun agrikultor substensia ba agrikultor komersial, tanba dadus ne’ebe mak iha, katak minimu tebes 2,6% “, dehan Diretora A.FD Bendita de Jesus Amaral ba jornalista iha suku Ritabou, Bobonara segunda (06/03/2023).
Diretora hatutan, Timor-Leste presija tebes atu tau koperasaun no apoiu masimu husi ajensia hotu ne’ebe iha Timor-Leste liu husi mos governu Timor-Leste atu bele tulun nafatin NGO sira atu nune’e husi grupu sira ne’e bele kapasita komunidade sira ne’ebe iha area rural hodi dezenvolve komunidade sira para bele halo dezenvolvimentu ne’ebe diak ba komunidade sira iha futuru.
Imajem treinador ba treinamentu Baziku Literasia no Numerasia
Bendita hatete, AUFD hala’o nia misaun iha munisipiu haat hanesan Baucau, Viqueque, Lautem no Bobonaro, tanba sira hetan konfiansa husi Ajensia internasional liu husi ADRA, hanesan membru Rede Feto ne’ebe hetan koperasaun husi ADRA fo fundu apoiu ba sira atu bele hala’o sira nia atividade kona ba treinamentu ne’ebe mak mai husi União Europeia no ajensia Austria, bazeia ba informasaun ne’ebe mak sira hetan iha aldeia ida ne’e, susar atu bele hetan tulun ruma husi ajensia non governmental sira seluk nune’e mos husi governu, husu haraik an ba governu no parte relevante atu bele tulun inan-aman no komunidade sira ne’ebe hela iha aldeia refere no hadia estrada diak ba inan-aman sira atu nune’e bele asesu ba merkadu
Nia Informa, A.UFD nia observasaun ba iha Aldeia Uat, iha area ne’ebe mak rural tebe-tebes presija tebes atu bele hetan tulun husi governu nune’e mos ba iha ajensia sira hotu, ne’ebe hanesan mos sosidade sivil servisu mos iha parte advokasia liu husi ajensia sira, situasaun real iha aldeia ida ne’e presija tebes tulun husi governu ho emprejariu sira, inan-aman no veteranu/a sira ne’ebe mak eziste iha suku Ritabou hamutuk ho autoridade lokal iha munisipiu ida ne’e atu tau liman ba malu atu bele fo hanoin no ideia ba malu bele halo konstrusaun ba iha estrada, difisil tebes atu komunidade asesu merkadu, maski sira iha produtu agrikola nian ne’ebe barak
Iha Fatin hanesan, Diretor Fundasaun-Hametin Dezenvolvimentu Edukasaun no Ekonomia Rural (F.HAFEER), Abel Pereira Mau-reci apresia ba AUFD tanba bele halo abertura ba treinamentu iha Munisipiu Bobonaro
“Ami apresia no orgullu teb-tebes bele hetan parseiru ho AUFD ne’ebe eziste iha Munisipiu Baucau, ohin loron bele halo abertura treinamentu iha Munisipiu Bobonaru, Postu Maliana, Suku Ritabou, Aldeia Uat espesial ba Grupu Dodes ne’ebe la’o ho kondisaun finanseiru ho filosofia ida katak hafanun nafatin ho komunidade iha area rural hodi bele prevene no propoin sira nia produtu lokal liu husi sira nia atividade lor-loron ne’ebe mak sira halo”, tenik Abel
Abel mos rekomenda ba iha A.UFD no ajensia internasional sira, karik bele akompanha informasaun husi organizasaun A.UFD no organizasaun F.HADEER ne’ebe mak iha Munisipiu Baucau no Bobonaru atu bele dezenvolve grupu sira ne’ebe mak sira estabelese atu nune’e sira bele aumenta sira nia kapasidade hodi bele dezenvolve diak liu tan ba futuru
Reportagen: Antonio Altamiranda