![SEJD-KRAM Halo Lansamentu Apoiu Fundu Dezenvolvimentu Ba Organizasaun Arte Marsial 17 SEJD-KRAM Halo Lansamentu Apoiu Fundu Dezenvolvimentu Ba Organizasaun Arte Marsial 17](https://sapnewstl.com/wp-content/uploads/2023/04/IMG20230413105033-scaled.jpg)
SEJD-KRAM Halo Lansamentu Apoiu Fundu Dezenvolvimentu Ba Organizasaun Arte Marsial 17
Imajen: Prezidente FESTIL Hermenegildo Custodio da Silva Lee Dekrasaun OAM 17 Prontu Hakruk Ba Lei Vigora Iha Timor-LesteIha Jinajiu Desportu Dili Kinta (13/04/2023).
SAPNewsTL, Dili: Sekretariu Estadu Juventude Desportu (SEJD) ho Komisaun Regulador Arte Marsial (KRAM) halo ona lansamentu apoiu fundu ba Organizasaun Arte Marsial 16 hamutuk ho federasaun Silat Timor-Leste (FESTIL) hodi nune’e organizasaun sira ne’e dezenvolve ho diak iha Timor-Leste.
“Serimónia ohin ne’e ita halo lansamentu fundu dezenvolvimentu ba organizasaun arte marsial ne’ebe ita halo avaliasaun ba proposta husi OAM 16 konklui hotu ona tan ne’e Lansa ho serimónia ida para simbolika ba publiku katak ita hahu halo distribuisaun fundu dezenvolvimentu ba OAM 16 ho montante dollar amerikanu millaun 2,5 ba dezenvolvimentu OAM durante tinan haat nia laran”, dehan prezidente KRAM Fernando da Costa ba jornalista sira iha fatin lansamentu jinajiu desportu Dili kinta (13/04/2023).
Prezidente hatutan, fundu ne’e governu fo atu OAM sira atu dezenvolve kategoria lima maka atu jere sira nia organizasaun diak liu tan liu husi kontrolu membru sira, resensiamentu ba sira nia membru, formasaun ba treinador no arbitrajen sira, kompetisaun no organizasaun arte marsial sira halo sede no organizasaun sira ne’e prense ona kriteria atu hetan fundu.
Nia informa, orsamentu governu apoiu ba organizasaun sira ne’e bazeia ba proposta ba atividade OAM hatama ba KRAM kada tinan tanba orsamentu ne’e sei apoiu ba tinan haat nian no orsamentu ne’e sei apoiu uluk 40% depois mak 60% tuir fali, karik planu OAM sira hakarak halo kompetisaun uluk governu fo apoiu ba ida ne’e.
Iha fatin hanesan SEJD Abrão Saldanha hatete, ohin to’o ona loron halo lansamentu fundu dezenvolvimentu ba organizasaun arte marsial sira atu nune’e sai modalidade desportivu diak iha Timor-Leste.
“Ohin ita to’o ona loron halo lansamentu fundu dezenvolvimentu ba organizasaun arte marsial 16 hamutuk ho FESTIL ne’ebe governu apoiu organizasaun arte marsial sira nune’e hamutuk para dezenvolve arte marsial sira iha Timor-Leste sai modalidade desportivu diak iha Timor-Leste”, tenik
Abrão haforsa tan, fundu ne’e distribui atu rezolve problema sira iha OAM sira liuliu mak organizasaun sira bele forti liu, iha kapasidade atu kontrola nia membru sira, iha treinador diak treinu Timoroan sira diak liu tan, sekretariadu funsiona permanente tau matan ba organizasaun no organizasaun ida-idak halo sira kompetisaun desportivu atu membru sira hatudu talentu orgullu ba organizasaun no Timor-Leste.
Iha Sorin Seluk prezidente FESTIL Hermenegildo Custodio da Silva dehan, sira nu’udar OAM hamutuk 17 deklara sei halo tuir lei KDRTL no hakruk ba Eroi no eroina sira.
“Ami organizasaun arte marsiál hanesan Persaudaran Setia Hati Terate (PSHT), Ikatan Kera sakti-Putra Timor-Leste (IKPS-PTL), Kmanek Oan Raik Lara (KORK), Perisai Diri Silat Timor-Leste, FederasaunTaekwondo Timor-Leste, Federasaun Shorinji Kempo, Federasaun AIKIDO,Federasaun Boxe Amadora Timor-Leste, Federasaun Muay Thai Timor-Leste, Asosiasaun Silat Padjadjaran Nasional, Sinar Putih, Gerbawasik THS-THM, Federasaun Wushu, Federasaun Karate-do, Federasaun Judo, Seruling Dewata, Federasaun Silat Timor-Leste deklara katak respeitu halo tuir no hakru’uk ba lei inan Konstituisaun Repúblika Demokrátika Timor-Leste (K-RDTL) no ba eroi no eroina sira mak mate no fakar ran ona ba luta ukun rasik an nian
Hermenegildo akresenta tan, sira deklara ona katak sira respeita liberdade expresaun no direitu sivíl no politíku sidadaun ida-idak nian, liuliu membru OAM sira nian nokontinua ezerse direitu hirak ne’e iha eleisaun parlamentár nian tuirdalan dame; Valoriza diversidade OAM ida-idak nia fiar ba tradisaun no kultura organizasaun nian, no inklui mos OrganizasaunArte Rituál, sira hotu iha teritóriu Timor-Leste laran tomak, Kontinua luta ba prevensaun konflitu ho violénsia, harii no hametin dame iha komunidade, hakribi violensia ho forma saida deit, habelar tradisaun dame nahe-biti bo’ot tuir kultura-lisan Timor nian.
Prezidente FESTIL aumenta tan, sira prontu ezerse sira nia direitu demokratiku tuir dalan dame nian, la monu balasu no lia-bobar sira ne’ebe nakonu ho tendensia perturba ordempubliku, destabiliza situasaun hakmatek iha komunidade, no iha nasional no sira afirma ba públiku katak sira OAM la envolve ka afilia ka kualker partidu politiku no kontinua mantein OAM nia indepedensia no imparsialiadade no prontu koopera ho lideransa komunitária, PNTL, STAE no CNE, no mos KRAM hodi buka solusaun ba konflitu ka violénsia mak envolve membru organizasaun arte marsial no sei hakas liutan hodi mantein situasaun dame iha komunidade no mos entre OAM sira.
![](https://sapnewstl.com/wp-content/uploads/2023/04/IMG20230413104657-scaled.jpg)
Imajen: Prezidente KRAM Fernando da Costa Hamutuk Ho Reprezenta Federasaun Wushu Timor-Leste Asina Akordu Ba Fundu Dezenvolvimentu Iha Jinajiu Desportu Dili, Kinta 13/04/2023
Entretantu fundu dezenvolvimentu governu apoiu ba organizasaun arte marsial 17 durante tinan haat mak federasaun boxing hetan 143, 700 USD, federasaun muay-Thai simu 111, 300 USD, federasaun taekwondo simu 134,600 USD, federasaun karate-Do simu 134, 000 USD, federasaun shorinji kempo hetan 96, 900 USD, Aikido simu 90,500 USD, federasaun wushu simu 96,800 USD, federasaun judo 79,300 USD, IKS PTL simu 335, 467 USD, PSHT hetan 335, 467 USD, KORK simu 335, 4,67 USD, Seruling Dewata simu 87, 700 USD, Perisai Diri simu 87,300 USD, Padjadjaran simu 94,100 USD, THS-THM Gerbawasik 90,900 USD, Sinar Putih simu 88,400 USD, Federasaun Silat Timor-Leste simu 169, 100 USD.
Reportajen: Augusto dos Santos