Audiénsia Ho PM Xanana, Singapura Hakarak Loke Embaixada Iha TL

SAPNewsTL, Dili: Ohin Primeiru-Ministru, Kay Rala Xanana Gusmão hala’o reuniaun kortezia ho Ministru Negósiu Estranjeiru Repúblika Singapura, Vivian Balakrishnan iha Palasiu Guvernu Dili

Ministru Negósiu Estranjeiru Repúblika Singapura, Vivian Balakrishnan deklara Singapura kompromitidu apoia Timor-Leste nia adezaun ba membru Organizasaun Sudeste Aziátiku (ASEAN)

“Agradese tebes bele mai hasoru Primeiru-Ministru, Kay Rala Xanana Gusmão ema ida ne’ebé ita admira no respeita, nia mak ema ne’ebé luta ba independénsia nasaun ida ne’e, dadaun ida-ne’e sei hola parte iha ASEAN hanesan Singapura respeita tebes no hakarak servisu hamutuk iha futúru,” informa Ministru Vivian Balakrishnan iha, hafoin hasoru malu ho Primeiru-Ministru Xanana, iha Gabinete Fronteira Marítima, iha Palásiu Governu.

Ministru Vivian Balakrishnan konsidera Primeiru Ministru Xanana nu’udar amigu antigu Singapura nian.

Iha fatin hanesan, Primeiru-Ministru, Xanana Gusmão konsidera vizita Ministru Negósiu Estranjeiru Singapura ne’e hatudu pasu pozitivu ba nasaun rua atu servisu hamutuk.

“Agora ami sei hare orgánika Governu nian, no sei diskute Orsamentu Retifikativu, más hanoin kona-ba futúru depois sei iha nafatin kontaktu, Singapura mós hakarak tau embaixada sira nian iha ne’e, maibé molok estabelese sei haree fatin,” dehan PM.

PM Xanana konsidera Singapura nu’udar país ida ne’ebé fó ezemplu di’ak ba Timor-Leste, iha área lubuk ida ne’ebé bele iha partisipasaun, kooperasaun ne’ebé di’ak ho Singapura.

Durante enkontru, PM Xanana akompaña hosi Ministru Negósiu Estranjeiru no Kooperasaun, Bendito dos Santos Freitas, no Embaixadora Timor-Leste iha Singapura, Maria Natália Viegas Carrascalão no Ministru Negósiu Estranjeiru Singapura akompaña hosi Embaixadór Repúblika Singapura ba Timor-Leste, Robin Hu no membru delegasaun sira

Reportazen : Marcela Mery & Zenoveva Lopes